Ndonjëherë është thjesht një fjalë e vogël që i bën burrat të tërhiqen emocionalisht, jo sepse janë të ndjeshëm si qelq, por sepse ndihen të pavlerësuar, të gjykuar apo të sulmuar. Dhe ndonjë prej këtyre frazave, pavarësisht se nuk duken katastrofike, janë për burrat si një shuplakë turpëruese.
Nëse nuk ke ndërmend të shkatërrosh atmosferën e marrëdhënies (ose thjesht s’do t’i japësh një arsye tjetër për të heshtur 3 ditë rresht), ndoshta ia vlen të jesh pak më e kujdesshme me atë që do të thuash.
Këto janë shprehjet që burrat urrejnë më shumë të dëgjojnë nga një grua:
1. “Bëhu burrë!”
Përkthehet “je duke u sjellë si djalë i vogël dhe nuk je mjaftueshëm burrë për mua.” Kjo është një ndër shprehjet më ulëse dhe më të mbushura me pritshmëri toksike. I thua që nuk ka të drejtë të jetë i ndjeshëm, i lodhur apo i pasigurt – sepse në mendjen tënde, burri duhet të jetë gjithmonë i fortë dhe i qetë si guri.
Zëvendësoje me “unë besoj te ti dhe dua të jem mbështetja jote kur ke nevojë”.
2. “Je njësoj si ish-i im!”
S’ka gjë më fyese sesa ta krahasosh me njeriun që (për arsye të kuptueshme) nuk e do më. E bën të ndihet sikur nuk ka asnjë shans të bëjë më mirë – dhe se po konkurron me hijen e dikujt tjetër.
3. “Po mirë, bëj si të duash.”
Në thelb po thua “s’më intereson më.” Tregon që e ke fikur lidhjen emocionale. Të gjithë e ndjejnë, sidomos burrat – që shpesh kanë nevojë për konfirmim të qartë që je ende aty, edhe kur je e zemëruar.
4. “Ti gjithmonë…” / “Ti kurrë…”
Ekzagjerimet si “ti gjithmonë harron” ose “ti kurrë nuk më dëgjon” janë si të thuash që asgjë që bën ai nuk është e mjaftueshme. I vret moralin dhe e bën të ndihet i paaftë. Askush nuk reagon mirë kur i thua që është dështim i vazhdueshëm.
5. “Rritu pak!”
Një tjetër mënyrë për t’i thënë që po sillet si fëmijë – dhe që ti nuk e sheh më si burrë të pjekur. Ai e përjeton si një koment që i prek egon në mënyrë të thellë.
6. “Po e ekzagjeron!”
Kjo është mënyra më e shpejtë për ta bërë të mos hapet më me ty. Nëse ai po përpiqet të tregojë ndjenjat dhe ti i thua se po e ekzagjeron, ai e përjeton sikur emocionet e tij nuk vlejnë.
7. “S’të intereson fare hë?”
E thua nga zhgënjimi, por ai e percepton si dyshim total ndaj ndjenjave të tij. Ai mund të ketë qenë duke u përpjekur, por jo në mënyrën që ti e prisje.
8. “Lëre se e bëj vetë!”
Zakonisht e thua kur je lodhur duke pritur apo duke sqaruar. Ai e dëgjon si “nuk je i zoti të më ndihmosh, më mirë pa ty”. Dhe kjo është e dhimbshme për çdo partner që në të vërtetë përpiqet.
9. “Shoqet e mia mendojnë që ti…”
Ndjeshmëri maksimale për këtë shprehje sepse asnjë burrë nuk do që miqtë apo familjarët e partneres ta shohin me sy të keq. Ai ndjen sikur po gjykohet nga të tjerë pa qenë aty për t’u mbrojtur.
10. “Kështu jeni ju burrat”
Këtu ose po normalizon sjellje që s’të pëlqejnë, ose po e fut brenda një stereotipi toksik. Në të dyja rastet, nuk po zgjidh problemin, vetëm po e vendos partnerin në një kuti që ai nuk e ka kërkuar.
11. “Asgjë s’kam jo!”
Fraza klasike që tregon gjithçka. Ai e ndjen që diçka nuk shkon, por ti nuk e thua. Kjo e lë të pasigurt dhe të tensionuar, sepse nuk di nëse duhet të të afrohet apo të të lërë hapësirë. Goca, djemtë dhe burrat e kanë vërtet të vështirë ta kuptojnë kompleksitetin e natyrës sonë. Ji më e drejtpërdrejtë kur ndihesh e shqetësuar, kështu dhe mund të punoni me njëri-tjetrin për t’u sqaruar sa më mirë.
