Një ditë më parë, SPAK iu përgjigj interesit të gazetarëve duke bërë të ditur se aktualisht janë në hetim tre deputetë, një ish-deputet dhe një ish-ministër, por pa dhënë asnjë emër.
Kjo ka ngritur pyetjen: a është ky ish-ministër Flamur Noka? Deputeti demokrat është paraqitur disa herë në SPAK, edhe pse në paraqitjen e 27 qershorit 2025, ai deklaroi se ishte thirrur për çështje që lidhen me denoncimet mbi krime zgjedhore, por jo si person nën hetim.
Pyetja e ngritur vjen si rezultat i akuzave të përsëritura nga Gazment Bardhi në drejtim të Flamur Nokës për një vilë 760 euro në Gji të Lalzit, për pengmarrje nga oligarkia e lidhur me pushtetin dhe për lidhje të dyshimta me botën e krimit.
Noka i ka mohuar publikisht këto akuza, duke i cilësuar si sulme politike, madje më vonë doli publikisht dhe u shpreh se e kishte “falur” Bardhin, ndërkohë që ky i dyti nuk i ka mohuar ende akuzat.
Megjithatë, deri më tani, SPAK nuk ka konfirmuar asnjë emër. Për momentin, e vetmja gjë e sigurt është se hetimet përfshijnë një ish-ministër, por identiteti i tij nuk është bërë publik.
Mirëpo, duke parë akuzat e Bardhit në drejtim të Nokës për fshehje dhe mosdeklarim pasurie dhe duke parë tipologjinë e hetimeve të SPAK, nuk do ishte çudi që ish-minsitri nën hetim të jetë Noka.
