Përpara se të diskutoni ribashkimin me një ish-partner, mbani mend këtë: Arsyen pse u ndatë.
Është e lehtë të kesh “amnezi të marrëdhënieve” pas një sërë ngatërresash romantike të pasuksesshme. Ndonjëherë njohjet ose lidhjet e dështuara pas ndarjes mund të bëjnë që pa kuptuar, të fillojmë të idealizojmë partnerët e vjetër. Ndjenja e dekurajuar ose, më keq, e dëshpëruar na lë në një pozitë të keqe kur bëhet fjalë për marrjen e vendimeve.
Për të kuptuar se ku ndodheni për momentin me lidhjen tuaj, duhet t’i bëni vetes një sërë pyetjesh. Ndoshta mund t’ju duhet ndihma e një miku të afërt për të eksploruar përgjigjet:
1. Pse u ndatë?
2. A po e idealizoni ish-partnerin tuaj dhe/ose lidhjen?
3. Çfarë ka ndryshuar që ju bën të mendoni se gjërat do të jenë ndryshe këtë herë?
4. Çfarë ka bërë ish-partneri juaj për t’u bërë një partner më i aftë, që nga ndarja? Po ju?
5. Nëse besimi është thyer në të dyja anët, a mund ta rindërtoni atë?
6. A jeni të dy të gatshëm të bëni punën që duhet për të riparuar atë që nuk funksiononte më parë? Si do ta bëni këtë “punë”?
Theksojmë veçanërisht pyetjen e tretë në atë listë: Çfarë ka ndryshuar? Çfarë pune keni bërë për veten tuaj për t’ju ndihmuar të përmirësoni aftësitë në marrëdhënie?
Problemet thelbësore që kanë ekzistuar dikur ka të ngjarë të vazhdojnë të ekzistojnë sapo të kaloni fazën e muajit të mjaltit. Nëse të dy nuk keni bërë shumë punë për veten dhe nuk jeni rritur vërtet, nuk keni zhvilluar aftësi të reja – ka të ngjarë ta gjeni veten përsëri në të njëjtin vend ku ishit kur u ndatë.
Kur bëhet fjalë për të bërë ndryshime, ka katër hapa thelbësorë, pa të cilët një marrëdhënie nuk mund të rregullohet:
1. Pendimi. Një falje e përzemërt vjen kur kuptoni se sa e keni lënduar partnerin/en. Të thuash “më fal” nuk mjafton. Këto janë vetëm fjalë. Një falje kuptimplote verbalizon kuptimin e dhimbjes që keni shkaktuar dhe tregon keqardhje për veprimet e ndërmarra.
2. Përgjegjësia. Marrja e përgjegjësisë do të thotë të tregosh pronësinë e veprimeve të tua si dhe ndikimin e tyre, edhe nëse dhimbja e shkaktuar ishte e paqëllimshme. Kur merrni përgjegjësinë, i bëni të ditur personit tjetër se e kuptoni peshën e situatës që keni shkaktuar dhe e kuptoni atë që keni bërë gabim.
3. Njohja/pranimi. Kur njerëzit e dinë se dhimbja e tyre është dëgjuar, kjo i ndihmon ata të shërohen.
4. Kura. Personi që bën ndryshime duhet të riparojë dëmin që është shkaktuar dhe të marrë masa për të shmangur përsëritjen e sjelljes së keqe. Të kesh një plan veprimi që adreson çështjet që shkaktuan atë sjellje është një fillim i mirë. Ndonjëherë kjo mund të nënkuptojë heqjen dorë nga rrjetet sociale, ndërrimin e punës, ndjekjen e terapisë ose shkuarjen në rehabilitim.
Nëse pas leximit të gjithë kësaj, ju ende mendoni se ribashkimi është gjëja e duhur, atëherë ia vlen ta provoni. Por filloni ngadalë. Kontaktoni ish-in dhe shikoni nëse ai ose ajo është i gatshëm të takohet për të bërë një bisedë. Kaloni pak kohë së bashku. Shihni nëse lidheni si më parë. Ju mund të zbuloni se thjesht s’keni më ndjenja për ta. Ose mund të zbuloni se historia juaj së bashku sapo ka filluar.
