Komisioneri Shtetëror i Zgjedhjeve Ilirjan Celibashi regjistron koalicionin e partive LSI dhe PDK nën logon “Shtëpia e lirisë” në zgjedhjet e pjesshme vendore të 6 marsit, por nuk njeh Komisionin e Rithemelimit.
Pavarësisht kësaj, të gjithë kandidatët e paraqitur nga ky koalicion janë nga Komisioni i Rithemelimit, asnjë prej tyre nuk është nga LSI dhe PDK.
Celibashi tha se partia udhëheqëse është LSI dhe ky vendim hyn në fuqi menjëherë.
Lëvizja Socialiste për Integrim i dërgoi më 1 shkurt Komisionit Qendror të Zgjedhjeve kërkesën për regjistrimin e koalicionit të ri “Shtëpia e Lirisë”, në kuadër të zgjedhjeve të pjesshme zgjedhore të 6 marsit në 6 bashki të vendit.
Sipas dokumentit, koalicioni përbëhej nga PD-Komisioni i përkohshëm i Rithemelimit, LSI dhe Partia Demokristiane e Nard Ndokës.
Ish-kryeministri Sali Berisha kur prezantoi më 31 janar kandidatët e Rithemelimit për zgjedhjet e pjesshme, njoftoi edhe koalicionin me disa parti, pasi sipas tij Rama ka konfiskuar PD-në në mënyrë që Komisioni i Rithemelimit të mos merrte pjesë në zgjedhje.
