“Për aq kohë sa Berisha drejton Partinë Demokratike, unë nuk kam vend aty”, ishte deklarata e ish-deputetit demokrat, Dashnor Sula. Ky i fundit u largua nga PD në periudhën e zgjedhjeve të 11 majit, teksa dhe pse ishte ndër më të votuarit nga procesi i Primareve, nuk u përfshi në listat zgjedhore. Fillimisht “ngërçi” ishte për përfshirjen e tij në listat e sigurta, ndërsa më pas nuk u bë pjesë as atyre të hapurave.
Në një intervistë për Report Tv, Sula tha se në Partinë Demokratike nuk respektohen kontributet dhe vlerat. Gjithashtu ish-deputeti komentoi dhe foltoren e vendosur përpara kryeministrisë ku demokratë mblidhen çdo të hënë në një “parlament” të dytë. Me ironi Dash Sula tha se më shumë njerëz mblidhen në dasëm sesa në organizimet e Berishës.
“Partia Demokratike edhe të tjera janë si një shoqëri aksionere që ke aksionet e tua, kontributet e tua dhe nëse nuk respektohen këto nuk ka rregulla loje. Unë isha në kulmin tim politikë sepse në qarkun Elbasan fitova primaret dhe u hodha në rrugë dhe s’më vunë as në listë të hapur për të kandiduar. Unë doja të isha edhe në listë të hapur për të mbledhur vota dhe për t’i treguar Berishën kjo është fuqia ime këto janë votat që kam unë. Dhe pastaj u katandisën me aq mandate sa s’ka bërë vaki ndonjëherë.
Unë isha aty ku isha po performoja pozitivisht po jepja kontribute, çfarë duhet që të bëja më shumë unë. Aty nuk respektohen kontributet dhe vlerat, jo se më zuri vendin një person tjetër, se kjo do të ishte e kuptueshme. Sa kohë do të jetë Berisha atje, unë nuk mund të jem më në atë parti.
Mirë votat i vjedh Rama po ata njerëzit që vijnë tek foltorja kush i vjedh. Ja merr Rama? Berisha nuk mbledh dot as sa për një dasmë. Edhe në një dasmë shkojnë më shumë njerëz. Nuk i vijnë njerëzit atij, nuk e ndjekin më, sepse ata e dinë për çfarë bëhet ajo foltore”, tha Sula.
