Gjithçka çfarë duhet është dashuria. Por çfarë duhet bërë për të qëndruar të dashuruar dhe cili është sekreti i një marrëdhënieje të gjatë dhe të lumtur?
BBC ka ndarë historitë e disa çifteve, pasi kontaktuan me më shumë se 100 prej tyre për të zbuluar “sekretin” e tyre.
Në të gjitha historitë, fraza të caktuara përsëriten vazhdimisht, duke përfshirë ndershmërinë, komunikimin, respektin, faljen, miqësinë dhe të qeshurën.
Dhe këshillat më të zakonshme? Të kapërcejmë debatet së bashku dhe të jemi të sjellshëm.
Për nder të Ditës së Shën Valentinit, ja disa nga ato histori dashurie dhe disa nga mësimet e nxjerra gjatë rrugës.
“Punë e palodhur dhe përkushtim”
Natën kur Miki dhe Xhoni u takuan për herë të parë, në një klub nate gjerman në shtator të vitit 1978, Xhoni ishte në fakt në një takim me dikë tjetër.
Miki tha se e takoi Xhonin në bar, “dhe mendova, po, do të dal me këtë djalin”.
Por, pavarësisht tërheqjes fillestare, historia e tyre ishte një histori dashurie që gati sa nuk ndodhi.
Puna e Xhonit në ushtri e çoi atë në Irlandë, ndërsa Miki mbeti si infermiere në Gjermani.
“Ndoshta rreth një vit pas takimit, fillova ta kuptoj gabimin që kisha bërë, kështu që shkrova një letër”, tha John, 70 vjeç.
Pa dijeninë e tij, puna e Mikit e kishte çuar diku tjetër, por për fat të mirë, kolegët e saj ia përcollën letrën e tij.
“Ishte e paracaktuar. Ishte vendosur shumë mirë në yje”, tha Miki, 69 vjeçe, ndërsa çifti feston 45 vjet martesë.
“Çfarë e sjell suksesin? Duhet shumë dashuri. Duhet shumë punë dhe përkushtim. Por duhet edhe pak fat”, tha Xhoni.
“Zgjidhni debatet menjëherë”
Mair dhe Alan Hicks, këtë vit festojnë 65-vjetorin e martesës. “Nëse keni një debat, zgjidheni menjëherë. Kemi pasur mosmarrëveshje, natyrisht, dhe nëse ndonjë çift thotë se nuk ka pasur, unë nuk do t’i besoja kurrë”, tha Alani, 88 vjeç.
Çifti thotë se pavarësisht “kohërave shqetësuese”, ata kanë ndarë një jetë të mrekullueshme, duke përfshirë kërcime me muzikë rock and roll, udhëtimet së bashku dhe përfundimisht mirëpritjen e dy vajzave.
Mair shtoi: “Për sa kohë që jeni bashkë, ia dilni mbanë”.
“Një sens i mirë humori”
Për Gary dhe Joy Walters nga Caerphilly, 54 vjet martesë u kanë mësuar një gjë kyçe: humori do t’ju ndihmojë të kapërceni kohërat e vështira.
“Mos më keqkuptoni, nuk kemi qeshur çdo ditë”, tha Joy, 72 vjeç.
Pasi u takuan në punë në një fabrikë lodrash në Cwmbran në vitet 1970, çifti u martua dhe pati dy vajza.
“Unë besoj se nuk duhet t’i lësh të lindin debate”, tha Xhoi, e cila gjithashtu beson se duhet ta mbyllësh gjithmonë ditën me një puthje.
“Dhe një sens i mirë humori mund të bëjë mrekulli”, shtoi ajo.
“Jepini gjithmonë përparësi njëri-tjetrit”
Kur Sahir takoi Denisën më shumë se 20 vjet më parë në një aktivitet fetar në Cardiff, të dy kishin përjetuar humbje dhe po përballonin jetën pas një divorci.
“Ka qenë një udhëtim dhe nuk ka qenë gjithmonë i lehtë”, tha Sahir, 49 vjeç, i cili kohët e fundit ka përjetuar ndërlikime shëndetësore.
“Ne gjithmonë kemi qëndruar të fortë dhe tani do të thoja se jemi më të fortët që kemi qenë ndonjëherë”, shtoi ai.
“Mendoj se duhet t’i jepni përparësi njëri-tjetrit”, tha Sahir.
Çifti tha se gjithmonë kishin punuar për të kapërcyer çdo problem dhe kishin qëndruar pranë njëri-tjetrit kur jeta i kishte vënë në vështirësi marrëdhënien e tyre.
“Dashuria është një vendim”
Kur Carolyn po ecte për të takuar Carl-in më shumë se 30 vjet më parë, një punëtor ndërtimi i hodhi një çekiç në kokë nga një ndërtesë pesëkatëshe, duke bërë që ai të dërgohej me urgjencë në spital.
“Shumica e njerëzve normalisht do të kishin një fillim romantik në marrëdhënien e tyre. Të të bjerë një çekiç mbi kokë, e konsolidoi idenë tek unë, në fakt, unë e dua shumë këtë person. Pra, po, u desh një çekiç”, tha Carl, 59 vjeç.
Çifti, i cili ka tre fëmijë dhe jeton në Blackwood, këtë vit do të festojë 30 vjetorin e martesës.
“Dashuria nuk është thjesht një ndjenjë e bukur, është një vendim shumë herë”, shtoi Carl.
Çifti qeshi ndërsa shpjegoi se çdo vit ata kanë “një rishikim të zhvillimit profesional” ku ulen dhe diskutojnë se si po shkojnë gjërat.
“Kur u martuam, vendosëm që do të kishim disa gjëra të panegociueshme në martesën tonë. Ne kurrë nuk dalim nga shtëpia gjatë një grindjeje. Nuk flemë kurrë në krevate të ndara. Nuk e themi kurrë fjalën me D… divorc”, shtoi Carolyn, 50 vjeç.
“Dashuria është të zgjedhësh njëri-tjetrin çdo ditë”
Pas më shumë se 16 vitesh së bashku, Zafar Khallyev dhe gruaja e tij Dilya aktualisht jetojnë mijëra kilometra larg njëri-tjetrit, në kontinente të ndryshme.
“Jeta na ka vënë në provë me distancën”, tha Zafar, 38 vjeç.
Ndërsa po përfundon doktoraturën në Universitetin e Swansea-s, Dilya është në atdheun e tyre, Uzbekistan, me dy fëmijët e tyre.
Ai tha se besimi dhe durimi i mbajtën ata të fortë.
“Dhe siguria e qetë se dashuria nuk ka të bëjë me fillimet perfekte,” shtoi ai, “por me zgjedhjen e njëri-tjetrit çdo ditë – pavarësisht distancës, pavarësisht kohës.”
