Shpeshherë kur flasim për fuqizimin e grave dhe vajzave, diskutojmë rreth aspekteve si arsimimi, pavarësia ekonomike, këshillimi i karrierës dhe mundësitë e punësimit. Sigurisht, të gjithë këta komponentë janë të rëndësishëm përgjatë rrugëtimit të këtij fuqizimi. Megjithatë, fuqizimi psikologjik është një urë lidhëse mes përmbushjes së objektivave dhe qëllimeve përsa i përket fuqizimit në fushat e mësipërme.
Por si mund të arrihet fuqizimi psikologjik i grave dhe vajzave dhe çfarë nënkupton realisht ky koncept?
Fuqizimi psikologjik i grave dhe vajzave lidhet me procesin e të ndihmuarit ato që të kuptojnë vlerat dhe aftësitë e tyre, duke zbuluar dhe arritur më tej potencialin e tyre. Të qenurit të fuqizuara psikologjikisht, ndikon pozitivisht në rritjen e vetëbesimit dhe vetëvlerësimit, duke patur kështu një imazh pozitiv për veten; në reduktimin e nivelit të stresit; si dhe në të vendosurit kufij të shëndetshëm me të tjerët. Kufijtë e shëndetshëm u mundësojnë grave dhe vajzave jo vetëm që të advokojnë për të drejtat e tyre, por njëkohësisht krijojnë një hapësirë personale dhe sociale më të sigurtë për to.
Jo pak herë në shoqëri të ndryshme, të drejtat dhe ëndrrat e grave dhe vajzave jo vetëm që minimizohen, por edhe mohohen, ndaj fuqizimi psikologjik do t’i bënte ato më të pavarura, por edhe do të krijonte kushte më të mira përsa i përket arritjes së vetëaktualizimit. Procesi i vetëaktualizimit do t’i ndihmonte gratë dhe vajzat në të qenurit versioni më i mirë i vetes së tyre, i cili përmirëson ndjeshëm mirëqenien psikologjike. Një gjendje e përmirësuar e mirëqenies psikologjike, u mundëson grave dhe vajzave aftësinë për të menaxhuar në një mënyrë më të shëndetshme dhe autonome rolet e tyre sociale.
Disa elemente të tjera, të cilat do të ndikonin pozitivisht në fuqizimin psikologjik të grave dhe vajzave, janë ofrimi i këshillimit psikologjik, krijimi i grupeve mbështetëse, zhvillimi i trajnimeve dhe workshop-eve të ndryshme lidhur me tematika që ndikojnë drejtpërdrejt në këtë fuqizim. Në këtë mënyrë, këto elemente do të mund të kishin një impakt pozitiv në zhvillimin personal dhe emocional, të cilët janë të lidhur ngushtë me fuqizimin psikologjik.
Padyshim që mbështetja sociale ka gjithashtu një ndikim të rëndësishëm në fuqizimin e grave dhe vajzave, por edhe potenciali i tyre i brendshëm dhe resilienca, janë thelbësore lidhur me fuqizimin e tyre. Në këtë perspektivë, thënia “Mos kërko vetëm dritë; bëhu ti drita…” na bën të reflektojmë se çdo grua dhe vajzë duke ndriçuar rrugëtimin e saj drejt fuqizimit, mund të shndërrohet në një shkëndijë drite dhe model suksesi në rrugëtimin e grave dhe vajzave të tjera.
Klaudia Halahula
