Që Amber Heard ka qenë në qendër të vëmendjes vitet e fundit, kjo nuk është ndonjë surprizë – nga divorci i bujshëm me Johnny Depp, te rolet e reja në film dhe ardhja në jetë e binjakëve. Por përveç këtyre, Heard mbante prej vitit 2016 një tjetër “titull” të pazakontë: gruaja më e bukur në botë sipas shkencës, falë përputhjes së fytyrës së saj me “Golden Ratio” – një koncept i lashtë grek për përsosmërinë fizike.
Mirëpo, vendi i parë ka ndërruar duar disa herë që atëherë.
Në 2019-ën, supermodelja Bella Hadid u shpall “më e bukura sipas shkencës”, me 94% përputhje me përmasat ideale të fytyrës. Beyonce mori vendin e dytë, ndërsa Amber zbriti në vendin e tretë.
E ndërkohë, një kompjuter diku në Londër (po, seriozisht) mat çdo milimetër të fytyrës për të vendosur objektivisht kush është “perfekte”.
Në vitin 2024, Anya Taylor-Joy u shpall si “më e bukura në mënyrë shkencore”, me 94.66% përputhje me raportin e artë të bukurisë, veçanërisht për pozicionin e syve dhe formën e vetullave. Pas saj vjen Zendaya, ndërsa Bella Hadid kalon në vendin e tretë.
Po ndonëse kjo lloj “matjeje” mund të duket si një lojë teknologjike simpatike, e vërteta është se bukuria nuk matet me algoritme. Personaliteti, origjinaliteti dhe mënyra se si ndihesh në lëkurën tënde nuk përfshihen në asnjë ekuacion shkencor – dhe ndoshta, kjo është ajo që e bën bukurinë vërtet të vështirë për t’u përcaktuar.
