Kreu i FRPD dhe kandidati për deputet i PD, Besart Xhaferi, ka mbajtur një fjalim ku ka prezantuar një paketë të re për rininë shqiptare.
Ai ka deklaruar se qeveria e ardhshme, me Sali Berishën në krye, do të zbatojë politika që do të mundësojnë rinisë të blejë një banesë të re me kushte të favorshme.
Ai tha madje se për çiftet që kanë 3 fëmijë, kredia deri në 30 mijë euro do të falet plotësisht. Ky projekt, siç u shpreh ai, është inspiruar nga një iniciativë e ngjashme nga partia në pushtet e Hungarisë, që ka në fokus mbështetje për familjet.
“Më 12 maj, Shqipëria Madhështore do jetë realitet. Do të zbatojmë projektin, që rinia të blejë shtëpi të re.
Qeveria Berisha 3 do i japë mundësi rinisë, që ta ketë banesën e vet. Për 20 përqind të depozitës, rinia do ketë zero interes.
Nëse një çift ka 3 fëmijë, kredia 30 mijë euro do falet totalisht. Kjo është paketë e marrë nga partia në pushtet e Hungarisë, që ka në fokus familjen.
Shkollat publike do i bëjmë me 8 orë në ditë. Do të ndërtojmë adoleshentë të shëndoshë fizikisht e mendërisht.
Shteti do jetë përkrahës i rinisë, kur ata ndërmarrin përsipër të hapin një biznes. Për çdo të ri që kthehet në vend, do ketë lehtësira”, tha ai.
