23 minuta përpara se të ndodhte shpërthimi në derën e jashtme të shtëpisë së Armand Dukës, autori i dyshuar për vendosjen e tritolit në shtëpinë e presidentit të FSHF-së, është filmuar në një qendër tregtare.
Report Tv ka siguruar pamjet e kamerave të sigurisë në qendrën tregtare, ku duket 34-vjeçari Arlen Hasanaj. Video është përdorur nga avokati i 34-vjeçarit përpara trupës gjykuese me pretendimin se ai nuk është autori i ngjarjes.
Ditën e shpërthimit të tritolit në shtëpinë e Dukës në lagjen nr.4 në Durrës, Hasanaj është filmuar në qendrën tregtare ‘Megateg’ ekzaktësisht në orën 21:40, ndërkohë që shpërthimi ka ndodhur në 22:03. Nga një përllogaritje e përafërt për të shkuar nga qendra tregtare në autostradën Tiranë-Durrës në lagjen nr.4 të qytetit bregdetar duhen 20 minuta, nëse makina lëviz me shpejtësi dhe ngjarja ka ndodhur 23 minuta më pas, praktikisht e pamundur që Arlen Hasanajn të jetë personi që vendosi ekzplozivin, por u mbetet organeve kompetente per te verifikuar dhe faktuar ngjarjen.
Arlen Hasanaj, 34-vjeçari rezulton pronar i një biznesi privat në qytetin bregdetar, më konkretisht i kompanisë ‘Euroshop Durrës’ themeluar në korrik të 2020, me ortak Albi Lika. Dyshimet e para janë se ngjarja ka ardhur si pasojë e një konflikti për biznesin, kjo pasi siç Report Tv mëson, kur inspektorët e Tatimeve shkuan 2 ditë më parë për kontroll në ambientet e kompanisë së vezëve “Aiba”, në pronësi të kreut të FSHF-së, Armand Duka dhe vëllait të tij deputet, Agron Duka thanë se kanë pasur denoncim nga një klient i pakënaqur, që mendohet të jetë ‘Euroshop Durrës’. Pikërisht ky klient i pakënaqur dyshohet të jetë 34 vjeçari Arlen Hasanaj, i cili është edhe pronar i një dyqani vetëm 500 metra larg nga shtëpia e Dukës në Durrës, pikërisht aty ku dje vendosi lëndën plasëse.
Rendit zhvillimet sipas orarit:
Të Fundit
Ora 22:12
Tritoli në shtëpinë e Dukës, avokati i autorit të dyshuar: Arlen Hasanaj nuk ka lidhje me ngjarjen, ja provat
Ditën e nesërme do të mbahet seanca gjyqësore për 34-vjeçarin Arlen Hasanaj, i cili akuzohet si autori i dyshuar për vendosjen e tritolit në derën e jashtme të shtëpisë së Armand Dukës. 34-vjeçari ka mohuar të jetë autori, ndërkohë që Report Tv mëson se avokati i tij mbrojtës, Ilia Ilia do paraqesë nesër në seancë pamjet filmike ku Hasanaj ndodhet në qendrën tregtare 23 minuta para shpërthimit të tritolit, video e siguruar edhe nga Report Tv.
“Shtetasi Arlen Hasanaj ka hyrë në orën 20:30 pranë ‘Megatek’-ut dhe ka dalë tek arka për të bërë pagesën në orën 21:37 minuta. Në orën 21:44 minuta ai ka dalë nga korpusi i ‘Megatek-ut. Në datën dhe orën e caktuar shtetasi në fjalë ka qenë në vend tjetër. Pamjet janë marrë edhe nga policia, por kanë siguruar vetëm pamjet e hyrjes në Megatek dhe jo të daljes, çfarë na bën të dyshojmë se janë bërë enkas”, thotë avokati.
Sipas avokatit, ‘në pamjet filmike duket se autori dhe shtetasi Hasanaj dallojnë në disa detaje në veshje, konkretisht autori ka veshur një bluzë tutë, ndërkohë që Hasanaj ka pasur një xhup të veshur, gjithashtu dallohen vizat e bluzës që ka autori i ngjarjes, ndërkohë që shtetasi Hasanaj nuk ka vijëzime në xhup dhe dallimi tjetër qëndron tek atletet të cilat autori i ka me logo të firmës “Nike” dhe Hasanaj i ka me vija të zeza.Një tjetër detaj që vjen nga burimet pranë policisë bëhet me dije të ketë lidhje me pamje të tjera filmike të sekuestruara pranë një qendre tregtare, në banesën e Alren Hasanajt, ku dallohet se ai që tashmë konsiderohet si autori i vërtetë, ka kaluar në orën 22:06 minuta, ndërkohë që ngjarja ka ndodhur në orën 22:04 minuta.’
Sjellim në vëmendje se distanca nga banesa e familjes Duka, deri tek qëndra tregtare është jo më shumë se 300 metra. Pritet që ditën e nesërme këto prova të paraqiten nga avokati në masën që do të mbahet për Arlen Hasanaj-n.
