SPAK ka regjistruar të paktën tre procedime penale mbi bazën e disa kallëzimeve ndaj Ilir Metës, për shpërdorim detyre, korrupsion pasiv, pastrim parash, fshehje pasurie, mashtrim me deklaratën e pasurisë etj. Për njërin prej kallëzimeve, referuar nga ish deputeti Halit Valteri për lobim në SHBA me qindra mijëra dollarë të pa deklaruara dhe që nuk u dihet burimi, SPAK, përpos regjistrimit të procedimet penal, ka marrë nën hetim Ilir Metën.
Në kuadër të hetimit, SPAK po mbledh informacione, ndërsa i ka kërkuar KQZ-së një kopje të formularit të vetëdeklarimit të Metës, për shkak se operon me dy mbiemra, si dhe i kë kërkuar Drejtorisë së Gjendjes Civile informacion mbi gjeneralitetet e Ilir Metës dhe ndryshime e mundshme.
Bëhet fjalë për procedimin me numër 122 të SPAK të vitit 2022. Report Tv mëson se në këtë procedim penale janë shënuar dy akuza penale, për të cilat Ilir Meta dyshohet se mund t’i ketë kryer.
Meta po hetohet nga SPAK për korrupsion pasiv parashikuar në nenin 259 të Kodit Penal, vepër e cila dënohet me burgim nga 3 deri në 8 vjet. Gjithashtu, Meta po hetohet edhe për falsifikimin e vulave, stampave ose formularëve, parashikuar në nenin 190/3 të Kodit Penal, vepër për të cilën parashikohet nga 3 deri në 7 vite burg.
Në kallëzimin penal thuhet se Ilir Meta dhe Monika Kryemadhi kanë konsumuar 8 vepra penale, si fshehje të ardhurash, korrupsion pasiv dhe aktiv, pastrim parash, shpërdorim detyre, fshehje pasuri, mospagim taksash etj.
Si fakte, në kallëzim thuhet se Ilir Meta dhe LSI-ja kanë lidhur kontrata lobimi në SHBA me kompaninë McKeon Group në vitin 2017, me vlerë qindra mijëra dollarë, duke fshehur shpenzimet si në KQZ, ashtu edhe në ILDKPKI, siç e parashikon ligji.
Bashkangjitur kallëzimit penal janë kontrata e lobimit, raporti financiar i LSI në vitin 2017 si dhe deklaratat e pasurisë së Metës, Kryemadhit dhe Vasilit për vitin 2017. Ballafaqimi i këtyre dokumenteve implikon rëndë Ilir Metën, por edhe Petrit Vasilin dhe Monika Kryemadhin.
Veprat penale për të cilat po hetohet Ilir Meta
Neni 259
Korrupsioni pasiv i personave që ushtrojnë funksione publike
Kërkimi ose marrja, drejtpërdrejt ose tërthorazi, i çdo lloj përfitimi të parregullt ose i një premtimi të tillë deri në vlerën 50.000 lekë ose ekuivalencën në monedhë të huaj, për vete ose për persona të tjerë, ose pranimi i një oferte a premtimi që vjen nga përfitimi i parregullt, nga personi që ushtron funksione publike, për të kryer ose mos kryer një veprim që lidhet me detyrën a funksionin e tij, dënohet me burgim nga dy deri në tre vjet. Po kjo vepër, kur përfitimi i parregullt ose premtimi i një përfitimi të tillë është mbi vlerën 50.000 lekë ose ekuivalencën në monedhë të huaj, dënohet me burgim nga tre deri në tetë vjet.
Neni 190
Falsifikimi i vulave, i stampave ose i formularëve
Falsifikimi ose përdorimi i vulave, i stampave apo i formularëve të falsifikuar ose paraqitja e rrethanave të rreme në këto të fundit, që u drejtohen organeve shtetërore, dënohet me burgim nga gjashtë muaj deri në katër vjet. Kur kjo vepër kryhet në bashkëpunim ose më shumë se një herë apo ka sjellë pasoja të rënda, dënohet me burgim nga gjashtë muaj deri në pesë vjet. Kur falsifikimi bëhet nga personi që ka për detyrë hartimin e tyre, dënohet me burgim nga tre deri në shtatë vjet. (Shqiptarja.com)
