Nga Bledi Mane
Mbrëmë vdiqën dy motra. Ela e madhja 22 vjeçe, e vogla Rezi 20 vjeçe. Nuk vdiqën as nga zjarret, as nga plumbat, as nga vaksinat e Covidit, as nga droga, as nga tumori.
Mbrëmë teksa udhëtonin me makinë dhe dëgjonin muzikë të bukur përballë tyre një moshatar 23 vjeçar që ngiste si i çmendur një makinë të shtrenjtë i përplasi frikshëm dhe ua la në mes jetët.
Motrat vdiqën dhe si për ironi fati muzika në makinën e tyre vazhdonte. Muzika vazhdon, vrasësi i tyre jeton ndërsa dy motrat bashkë me miliona ëndrrat e tyre varrosen sot…
Atdheu vazhdon të qajë sepse shumë të rinj po i largohen jashtë ndërsa ata që kanë mbetur këtu po vrasin njëri-tjetrin. Pardje u vranë në Korçë me thika, mbrëmë u vranë me makina në Sarandë.
Unë që nuk kam as thika e as makina të paktën i fshij lotët atdheut dhe kur atdheu dremit nga plagët filloj qaj edhe unë fshehurazi!
