Gjergj Buxhuku, administratori i Përgjithshëm i Konfindustria, ka denoncuar sot me forcë, dy problemet themelore të Bordit të Transparencës për çmimet e karburanteve, duke nënvizuar se sot produkti “naftë” duhet të ishte të paktën nën nivelin 200 lekë/litër, nga 209 lekë/litër që e ka vendosur Bordi dhe se anëtarët e këtij bordi, janë në konflikt interesi, pasi së paku gjysma e tyre janë përfaqësues të subjekteve që duhet të jenë vet objekt kontrolli.
Në deklaratën e Konfindustrisë, thuhet:
Konfindustria shpreh shqetësimin e përsëritur për mënyrën e vendim-marrjeve të Bordit të Karburanteve, qartësisht në kundërshtim me interesin publik me çmimet më të larta në rajon dhe kahjet e dukshme rënëse të tregjeve botërore.
Çmimet e larta krahasimore dhe absolute të karburanteve janë me pasoja afatgjata shkatërrimtare për biznesin, qytetarët, ekonominë kombëtare si dhe nxisin kontrabandën masive, që mund të shkojë në mbi 300 milion euro/vit.
Shembull i qartë për sa më sipër janë vendim-marrjet e javës së parë të muajit dhjetor 2022. Duke vlerësuar krahasimisht çmimet e tregjeve botërore me periudhën e fillimvitit, sot produkti “naftë” duhet të ishte të paktën nën nivelin 200 lekë/litër, nga 209 lekë/litër të vendosur nga Bordi.
Bien në sy vendim-marrjet e menjëhershme të Bordit në rast të rritjes së çmimeve të karburanteve në tregjet botërore dhe tejzgjatja në kohë në rastin e rënies.
Gjithashtu, rritjet e çmimeve në vlerë absolute janë shumë më të forta, sesa uljet përkatëse.
Konkretisht, në vendim-marrjet e fundit brenda dy ditësh, Bordi e rriti fillimisht çmimin e “naftës” me 8 lekë/litër dhe e uli me 5 lekë/ litër, me rritje përfundimtare me 3 lekë/litër.
Ndërkohë, çmimet e tregjeve botërore dhe rajonale janë në ulje të qartë.
Konfindustria ka kërkuar themelimin e Entit Rregullator të Karburanteve në varësi të Kuvendit të Shqipërisë dhe me përbërje të profesionistëve, – theksohet në përfundim. – . Bordi i Karburanteve ka në përbërje anëtarë me konflikt të qartë interesi. Gjysma e anëtarëve vendim-marrës janë pikërisht përfaqësues të subjekteve, që duhet të jene objekt kontrolli.”
