Shifrat janë të frikshme, alarmante, ulëritëse. Jo pak, por 756 mijë shqiptarë kanë marrë leje qëndrimi të një vendi të Bashkimit Europian në 14 vitet e fundit. Janë mijëra shqiptarë që kanë ikur çdo ditë, kanë rrezikuar, kanë lënë vendin e tyre për shkak të pasigurisë ekonomike dhe sociale. Janë me mijëra të tjerë që kanë ikur ilegalisht dhe qëndrojnë në një vend të BE-së fshehurazi, ne pritje për të marrë leje qëndrimi.
E dini se në 10 emigrantë që po hyjnë sot në Angli në mënyrë ilegale, 4 prej tyre janë shqiptarë? Po marrin gomonet në det të hapur e po largohen nga vendi. Kaq vend i pajetueshëm është bërë Shqipëria saqë ta rrezikojnë edhe jetën vetëm për t’u larguar. Pas lënë mijëra të afërm e familjarë që presin edhe ata të largohen drejt një shteti më të mirë e më funksional.
Po përse po largohen masivisht shqiptarët? Ne nuk jemi as një vend në luftë si sot Ukraina apo si dje Kosova. Nuk jemi as një vend i shkretuar si Zimbabve ku indeksi i varfërisë është mbi 100% dhe niveli i papunësisë mbi 95%. Ne jemi një vend me resurse të pafundme natyrore, një vend me 300 ditë diell, lagemi nga dy dete, e megjithatë shqiptarët po largohen.
Pabarazia e tmerrshme sociale ku në punë hyjnë vetëm militantët e partisë, përqëndrimi i ekonomisë në duart e 90 vetëve, korrupsioni, nepotizmi, pasiguria për jetën, shtrenjtimi ekstrem i kostos së jetesës dhe ekonomia në rënie si pasojë e keqqeverisjes, kanë bërë që shqiptarët të varfërohen çdo ditë. Djali i një politikani, apo i një oligarku mban në dorë një orë, vlera e së cilës është sa rroga vjetore e një të riu shqiptar. Këta kanë ndërtuar vila luksove në majë të kodrave ku vetëm ushqimi i maceve dhe qenve që mbajnë, kushtojnë më shumë se rroga vjetore e një familje punëtore.
Për 32 vite politikanët e varfëruan këtë vend, e vodhën, e plaçkitën së bashku me oligarkët e tyre, shfrytëzuan çdo pushtet për t’u pasuruar në kurriz të shqiptarëve dhe sot vendi po vuan pasojat e një keqqeverisjeje disa vjeçare. E megjithatë largimi nuk është zgjidhje; është detyrë patriotike qendrimi në vendin tonë dhe mosvotimi i këtyre që për 32 vite e kanë sjellë Shqipërinë në këtë gjendje.
Nëse largimi i shqiptarëve vazhdon, ata do të pasurohen më shumë, do të pasurohen edhe duke vjedhur paratë që ju sillni në Shqipëri për të afërmit. Nëse largimi i shqiptarëve vazhdon, qeverisjen do e përcaktojnë militantët dhe administrata të lidhur ngushtësisht mbas pushtetit. Shqiptarët e Kosovës nuk u larguan nga vendi edhe kur ishin në konflikt, por luftuan dhe sot janë shembull i votës dhe qeverisjes së një vendi. Ukrainasit nuk po largohen, por po qendrojnë të shpëtojnë vendlindjen e tyre.
Ndaj edhe ju, ne, të gjithë bashkë duhet të qëndrojmë për ta bërë Shqipërinë një vend më të jetueshëm, anëtar të Unionit Europian dhe një shtet të fortë ekonomikisht.
