Një koment i bërë nga Monika Kryemadhi gjatë një interviste për Top Albania Radio ka hapur diskutime të reja mbi marrëdhëniet brenda shtëpisë së BBV. Opinionistja e këtij sezoni ka analizuar zhvillimet e fundit, duke u ndalur veçanërisht te raportet mes Mateos, Brikenës dhe Selinit.
Edhe pse publiku i ka sytë te lidhja Mateo–Brikena, Kryemadhi shprehu bindjen se ndjenjat e Mateos mund të jenë të orientuara diku tjetër. Sipas saj, ai mund të ketë një pëlqim për Selinin, gjë që ndryshon krejt perceptimin e deritanishëm.
“Unë mendoj që Mateo pëlqen Selin,” deklaroi Kryemadhi.
Ajo la të kuptohet se kjo tërheqje mund të mos jetë vetëm nga njëra anë. Në analizën e saj, ekziston mundësia që edhe Selini të ketë një simpati për Mateon, madje një raport mes tyre mund të mbijetojë edhe pasi të përfundojë formati.
Kryemadhi e përshkroi Selinin si një banore që ndodhet në një situatë të ndërlikuar emocionale. Marrëdhëniet e saj brenda shtëpisë kanë kaluar nga afrimiteti në tension, duke krijuar përplasje pas një periudhe të gjatë bashkëpunimi.
Sa i përket afrimitetit me Gimbën, opinionistja e konsideron si një raport më shumë mbështetës sesa sentimental. Sipas saj, në izolimin e shtëpisë është e natyrshme të kërkosh një person për të ndarë ngarkesën emocionale dhe për të ruajtur ekuilibrin, pa nënkuptuar domosdoshmërisht një lidhje romantike.
