Pritja ka marrë fund. Shqipërisë pas shumë vitesh pritje, tashmë i janë hapur zyrtarisht negociatat për anëtarësimin në BE.
Kryeministri Rama në fjalimin e tij në Bruksel, u shpreh falenderues për hapjen e negociatave për Shqipërinë.
“Do t’ia nis me falenderime dhe dua të falenderoj presidenten e Komisionit, zonjën Ursula e cila e di dhe dinte se si të luftonte për ne dhe të gjitha shtetet anëtare.
Dua të falenderoj një tjetër zonjë gjermane që nuk është më aktive, por pa të nuk do të ishim këtu sot. Angela Merkel, ajo ka ditëlindjen dhe do doja t’i uroja gjithë të mirat.
Nuk do të ishim këtu pa përpjekjet e presidencës franceze dhe Macronit. Faleminderit mbarë popullit shqiptar, i cili kurrë nuk u dorëzua dhe kurrë nuk rreshti së ëndërruari ndjekjen e rrugës evropiane”, tha ai.
Kryeministri Rama u shpreh se falë popullit qëndroi në këmbë:
“Pas 3 vitesh kaq të ndërlikuara, ku refuzimet nga BE, lufta, pandemia krijuan një situatë të vështirë, por na forcuan. Ne e dimë që ky nuk është fillimi i fundit, por është fundi i fillimit.
Është mirë kështu si është dhe ne thjesht na duhet të ngremë dhe të ndërtojmë një Shqipëri evropiane dhe të fortë dhe një Ballkan të Hapur Perëndimor”, tha Rama.
