Themeluesi i Patagonia, Yvon Chouinard, i cili e ktheu pasionin e tij për ngjitjen nëpër shkëmbinj në një nga markat më të suksesshme të veshjeve sportive në botë, po e jep të gjithë kompanisë për të shpëtuar planetin.
Vendimi i tij shënon një shembull të ri në udhëheqjen e korporatave mjedisore. “Për momentin, Toka është aksioneri ynë i vetëm,” njoftoi kompania. “TË GJITHA fitimet, në përjetësi, do të shkojnë për misionin tonë për të shpëtuar planetin tonë.”
Chouinard, 83 vjeç, punoi me gruan dhe dy fëmijët e tij, si dhe ekipe avokatësh të kompanisë për të krijuar një strukturë që do të lejojë Patagonia-n të vazhdojë të funksionojë si një kompani fitimprurëse, të ardhurat e të cilës do të shkojnë për mjedisin.
Familja e Chouinard dhuroi 2% të të gjithë aksioneve dhe të gjithë autoritetin vendimmarrës për një trust (grupim i madh i intereseva të biznesit), i cili do të mbikëqyrë misionin dhe vlerat e kompanisë. Çdo vit, paratë që Patagonia fiton pas riinvestimit në biznes do t’i shpërndahen organizatës jofitimprurëse për të ndihmuar në krizën mjedisore.
Chouinard dhe Patagonia kanë qenë prej kohësh themelues në aktivizmin mjedisor dhe përfitimet e punonjësve. Patagonia ishte një nga kompanitë më të hershme që u bë b-Corp, një certifikim sipas të cilit një biznes po përmbush standarde të larta të performancës, llogaridhënies dhe transparencës, përfitimet e punonjësve etj. Së fundmi, ajo ndryshoi misionin e saj duke deklaruar: “Ne jemi në biznes për të shpëtuar planetin tonë.”
Patagonia ka ndërmarrë një sërë nismash mjedisore të natyrave të ndryshme, përfshirë edhe shpalljen e lumit Vjosa si Park Kombëtar.
Ekspertë kanë thënë se familja Chouinard është në krye përsa i përket bamirësisë dhe filantropisë. “Kjo familje është më e jashtzakonshme kur mendon se shumica e miliarderëve japin vetëm një pjesë të vogël të vlerës së tyre neto çdo vit,” tha për New York Times David Callahan, themeluesi i faqes së internetit Inside Philanthropy.
