Ilir Meta, i cili prej tetorit të vitit 2024 ndodhet në qeli, ka reaguar sërish lidhur me hetimet për pasurinë e tij, duke i cilësuar si akuza të pabazuara dhe të mbështetura mbi të pavërteta dhe falsifikime.
Ai pretendon se pavarësisht hetimeve që kanë hyrë në vitin e tetë, Prokuroria nuk ka paraqitur asnjë provë apo fakt penal që lidhet me pasurinë apo deklarimet e saj.
Sipas Metës, një ekspertim financiar i porositur nga familja e tij do të paraqitet në Gjykatë i cili do të rrëzojë pretendimet e Prokurorisë së Posaçme, duke provuar kështu se të ardhurat e tij për periudhën 1995-2023 janë mbi 87 milionë lekë të reja.
“Me këtë rast dua të falënderoj vajzën e madhe, Bora, e cila ka porositur një akt ekspertimi ligjor financiar që do ta paraqitim në Gjykatë, që rrëzon pretendimet absurde të prokurorisë, ku provohet se të ardhurat e mia të ligjshme për vitet 1995 – 2023 janë mbi 87 milionë lekë të reja, pa llogaritur faktin se të ardhurat e mia si deputet fillojnë që në Prill 1992 apo pagesat si ish-President i Republikës në vitet 2024-2025”, shkruan Meta duke theksuar kështu se hetimet ndërkombëtare për gjetjen e pasurive apo llogarive të fshehura nuk kanë prodhuar asnjë rezultat, duke këmbëngulur se nuk ekziston asnjë pasuri e padeklaruar apo e paligjshme në emrin e tij.
Ndër të tjera, kreu i Partisë së Lirisë ka përsëritur po ashtu të njëjtën qëndrim të cilin prej 1 viti e gjysmë po e mban, sa i përket akuzave të ngritura ndaj tij. Ai ka sqaruar se të gjitha pretendimet e Prokurorisë janë të pavërteta dhe se gjyqi ndaj tij është “politik”.
Reagimi i Ilir Metes:
Të nderuar gazetarë dhe përfaqësues të mediave!
Prej 15 muajsh, siç dihet botërisht, unë jam rrëmbyer në mënyrë të paligjshme nga banditë me maska dhe ende sot e kësaj dite nuk kemi asnjë person përgjegjës nga Prokuroria, pavarësisht nga kallëzimi ynë penal i bërë në SPAK.
Po kështu, prej 7-muajsh më është komunikuar akuza si i pandehur dhe ende Prokurorët nuk më kanë vënë në dispozicion një pjesë të mirë të akteve të dosjes të kërkuara nga unë me insistim në seancat gjyqësore.
Madje në seancën e fundit m’u dorëzua nga prokurorët një dëshmi, e cila kishte vetëm tre faqe, por që nuk dihej se sa faqe nuk i gjendeshin!
Nuk dua të zgjatem me plot anomali të tjera të kësaj farse gjyqësore që nuk ka asnjë lidhje me procesin e rregullt ligjor, sepse avokatët e mi të nderuar, Z. Kujtim Cakrani dhe Z. Gylsen Zhllima janë aty për të dhënë çdo sqarim me transparencë dhe profesionalizëm.
Por shkurtimisht dua t’ju theksoj me përgjegjshmëri absolute se edhe pse kemi hyrë në vitin e 8-të të hetimeve ndaj meje, nuk ekziston asgjëkundi asnjë provë apo fakt penal kundër meje.
Edhe pse kemi insistuar në çdo seancë që Prokuroria të dorëzojë listën e provave të pretenduara prej saj, kjo gjë nuk ka ndodhur në shkelje të procesit të rregullt ligjor.
Lidhur me akuzat për çështjen CEZ-DIA, dua të theksoj se kjo çështje është gjykuar dy herë brenda vendit dhe në Arbitrazhin e Vjenës.
Lidhur me gjykimin e saj brenda vendit tonë, asgjëkundi dhe asnjëherë nuk është përmendur emri im.
Po kështu, çështja CEZ-DIA është e vetmja çështje ku shteti shqiptar nuk ka dalë me humbje, por me fitim pasi dëmi efektiv për shtetin shqiptar ka qenë rreth 1 milionë euro si aksioner me 24% të kompanisë CEZ-Albania.
Ndërkohë që Z. Kastriot Ismailaj, i janë sekuestruar mbi 4 milionë euro që në vitin 2014.
Ndërsa lidhur me spekulimet mediatike, të shpërndara nga një media sorosiste, duke iu referuar Arbitrazhit të Vjenës, ka dy sqarime të qarta zyrtare dhe publike të bëra nga Clifford Chance, studio ligjore që mbrojti interesat e shtetit shqiptar, ku rrëzohen të gjitha këto spekullime.
Po kështu, dëshmitë e Z. Hejsek në Prokurorinë e Tiranës në Dhjetor 2011, janë të plota dhe shteruese se si është përzgjedhur DIA nga Bordi i CEZ-it pas prezantimit të bërë në Pragë dhe propozimit të bërë që në Mars 2010 përpara se të regjistrohej në Tiranë në 4.8.2010.
Po kështu janë të qarta në këtë dëshmi edhe referencat amerikane që ka paraqitur DIA për të fituar besimin e Bordit të CEZ-it në Pragë.
Po kështu është e njohur edhe partnerja amerikane e Z. Ismailaj në DIA, e cila është e përfshirë edhe në gjykimin e brendshëm (shqiptar) edhe në Arbitrazhin e Vjenës.
Lidhur me akuzën për lobimet, dua t’ju siguroj se nuk ekziston asnjë provë apo fakt që Ilir Meta të ketë shkelur ligjin shqiptar apo amerikan, por nuk ekziston asnjë fakt që Ilir Meta të ketë patur dijeni që një person tjetër shqiptar apo amerikan, po e shkelte ligjin për llogari të LSI.
Nënvizoj se kontrata e LSI me GSIS është shumë e mirëdetajuar dhe parandaluese për çdo veprim të dyshimtë nga cilido.
Kur të mbarojë seanca paraprake ne do publikojmë kontratën, por edhe letërporositë e dërguara, të cilat kanë synuar jo zbulimin e të vërtetës, por mjegullimin dhe fshehjen e të vërtetave.
Lidhur me çështjen e pasurisë dhe deklarimeve të pasurisë, dua të theksoj se akuzat e tre Prokurorëve janë të bazuara mbi të pavërteta dhe falsifikime.
Me këtë rast dua të falënderoj vajzën e madhe, Bora, e cila ka porositur një akt ekspertimi ligjor financiar që do ta paraqitim në Gjykatë, që rrëzon pretendimet absurde të prokurorisë, ku provohet se të ardhurat e mia të ligjshme për vitet 1995 – 2023 janë mbi 87 milionë lekë të reja, pa llogaritur faktin se të ardhurat e mia si deputet fillojnë që në Prill 1992 apo pagesat si ish-President i Republikës në vitet 2024-2025.
Shpreh keqardhjen time të thellë për harxhimet e pafundme që kanë bërë tre prokurorët e SPAK-ut me letërporositë e tyre anembanë planetit tonë nga Britania e Madhe në Afrikë dhe SHBA, duke kërkuar pasuri të patundshme apo llogari bankare të fshehura nga ana ime.
Jam krenar që ky hetim përndjekës e bazuar vetëm mbi shpifje, ka rezultat shumë të qartë: Zero qindrakë e padeklaruar apo e paligjshme nga unë.
Zero metër katrot apo pasuri e patundshme e padaklerauar nga unë apo e sekuestruar nga SPAK-u.
Duke qenë i bindur se avokatët e mi të nderuar, Z. Cakrani dhe Z. Zhllima do ju përgjigjen me transparencë, dua t’ju siguroj se jam i hapur për t’iu përgjigjur çdo pyetje tuaj në mënyrë të drejtpërdrejtë këtu nga IEPV 313 “Jordan Misja”.
Siç e dini edhe në Rusi lejohen mediat të intervistojnë kundërshtarët e regjimit në burgje.
Ndaj kjo mundësi nuk ka pse t’ju ndalohet dhe juve.
