Qoftë duke kërcitur gishtat, duke folur me zë të lartë ose me ton të ashpër, sjellja e keqe ndaj stafit të një restoranti, hoteli ose çdo shërbimi tjetër është një “mëkat” i madh.
Këtë javë, drejtuesi i talkshow James Corden u përball me kritika të ashpra. Corden u përshkrua si “klienti më abuziv” që ka kaluar pragun e një restoranti në New York, Balthazar, në 25 vitet e ekzistencës së tij. Pronari i restorantit, Keith McNally, pohoi në Instagram se ai e kishte ndaluar përkohësisht hyrjen e Corden pasi ishte “jashtëzakonisht i keq” me stafin në dy raste. Corden nuk ka dhënë versionin e tij të ngjarjeve, megjithëse i tha New York Times: “Nuk kam bërë asgjë të keqe në asnjë nivel.”
“Kamerierët mund të mendohet se marrin një rol të nënshtruar kur klientela mund të ketë pushtet mbi ta,” tha për Guardian Dr. Daniel Redhead, një studiues në Institutin Max Planck për Antropologjinë Evolucionare në Leipzig, Gjermani. “Këto asimetri në pushtet mund t’i bëjnë disa njerëz të veprojnë në mënyrë më dominuese – duke u sjellë vrazhdë në mënyrë egoiste dhe manipuluese – sepse ata besojnë se kjo strukturë e qartë hierarkike legjitimon një sjellje të tillë dhe nuk besojnë se do të përballen me ndonjë pasojë për veprimet e tyre.”
Faktorë të tillë si pasuria, një punë me fuqi të lartë ose fama mund ta rrisin këtë ndjenjë të të qenit “i pathyeshëm”. “Ju mësoheni të veproni në mënyra që nuk do të guxonit nëse do të ishit një person i zakonshëm,” thotë profesoresha Christine Porath, një psikologe në Shkollën e Biznesit McDonough të Universitetit Georgetown. “Ka më pak kufij për mënyrën se si veproni.”
“Në studimet tona, rreth 4% thonë se të qenit i pasjellshëm është ndjesi argëtuese,” thotë Porath. “Mund të ketë një element narcisizmi.” Ka gjithashtu prova se sjelljet e pasjellshëm janë “ngjitëse” dhe mund të përhapen në një vend pune dhe të normalizohen mes kolegëve, përveç rasteve kur ka kufij të qartë të sjelljes të përcaktuara nga menaxherët.
Sjelljet e pasjellshme dhe fyese, veçanërisht kur ndodhin në publik, janë një përvojë poshtëruese dhe stresuese që shpesh nxjerrin në pah më të keqen te njerëzit.
“Nëse dikush mendon se të tjerët janë sjellë keq me të, ka të ngjarë të motivohet të përgjigjet po njësoj,” tha Redhead. Për kamerierët, të cilët janë në presion të vazhdueshëm për t’u sjellë mirë me klientët, përgjigjja mund të jetë indirekte, për shembull duke vonuar porosinë, duke e sjellë qëllimisht të ftohtë ushqimin, ose në raste edhe më të këqija, duke pështyrë në ushqim ose duke hedhur substanca si detergjentë enësh e kështu me radhë.
Edhe në fusha të tjera, përballja me një klient të pasjellshëm dhe stresues mund të jetë tepër e vështirë për shkak të gjendjes emocionale dhe mendore.
“Kemi pasur disa studime me mjekë ku kemi bërë simulime mjekësore dhe kemi vënë re se ata kanë bërë gabime diagnostikuese, gabime procedurale, nuk kanë mundur të ringjallin një person siç duhet, kanë shkruar mjekimin e gabuar,” shtoi ai. “Në restorante, marrja e porosisë së gabuar nuk është një punë e madhe, por në zyrën e mjekut është.”
Pra, të qenit i pasjellshëm me stafin nuk është një mënyrë e zgjuar. Ju mendoni se po u bërtisni dhe do të merrni atë që dëshironi – në fakt, është e kundërta.
Guardian
