Postimin në profilin e tij në FB, gazetari Leonard Quku e ka titulluar “Sqarim i detyruar”. Pasi konfirmon se e kanë larguar nga detyra e Kryeredaktorit, Quku shkruan se ‘është alarmante kur një gazetar trajtohet në këtë mënyrë”.
Dhe ç’është e vërteta, në postimin e tij gjen shumë të dhëna që duhet të alarmonin përnjimend shoqatat në mbrojtje të gazetarëve. Si edhe portalet apo faqet online që së fundmi kanë dhënë prova publike se e kanë për zemër trajtimin, shkarkimin, whatsapimin e gazetarëve.
Ja disa copëza nga postimi i zotit Quku:
“…hedhë në rrugë njerëz pa shkak, pa paralajmërim e për më tepër refuzon të bëjë edhe likujdimet që ia ngarkon ligji”.
“…Vendimi i njëanshëm për shkarkimin tim është marrë pa motiv, pa paralajmërim dhe pa respektuar ligjin, Kodin e Punës…
“…Ka patur presione, shtrëngime dhe dhunë psikologjike të vazhdueshme ndaj meje dhe familjes time….”
“…Pse u sekuestrua kompjuteri im i punës me urgjencë dhe u fshi user-i im i lajmeve? Këto janë të dokumentuara…”
“…Imagjinoni mua nuk më jepet kontrata e punës dhe urdhri i emërimit në punë…”
“..presionet e brigadierit të tatimeve që nuk le bisedë WhatsApp-i pa ua përgjuar..”
Të gjitha pohimet e mësipërme janë marrë nga postimi i kryeredaktorit të shkarkuar. Lindin këtu disa pyetje: Ku është Unioni i Gazetarëve i zotit Aleksandër Çipa? Po Shoqata e Gazetarëve e zotit Armando Shkullaku? Po Federata e të përndershmit Rikardo Gutierez? Po Birni, vetë Syri, media dhe gazetarë afër opozitës si Ola, Kola, Çimi, Agimi, a janë dakord me këtë sjellje ndaj kolegut?
Pse e themi këtë? Pse u kërkojmë të vihen në siklet e të thonë një fjalë për rastin e zotit Quku?
Sepse jo më larg se tre katër ditë më parë, të nderuarit e mësipërm bënë një gurgule të madhe, për një përgjigje në Whatsapp të kryebashkiakut të Tiranës, për një gazetare që i kishte “ngatërruar padashje” nja dy shkresa.
24 orë më pas të njëjtët iu sulën Alfred Pezës pse po tenton të vejë në punë hekurishten e ndryshkur nga parazitizmi me emrin e madh RTSH. E akuzuan për shkarkime arbitrare dhe i dhanë ultimatum të tërhiqet urgjentisht…
E pra, sjellja me dy stardarde, hipokrizia, militantizmi partiak, qurravitja klanore, shënojnë këtu një tjetër rekord.
Pastaj shfryjnë nëpër rrjete sociale si ka mundësi që ky qerrata popull koti nuk na i besoka më, as ata, as partitë, as shoqatat, as portalet, as opozitën…
Më keq do bëhet për sa kohë Mandrat, Sandrat, Riku dhe ai që u hedh kokrra nga fiku, të vazhdojnë të shohin qimen te syri tjetrit, por jo trarin që kanë vetë në gojë.
Kaq për sot, siç thotë dhe zoti Quku.
