Besmir Kumria, një 32 vjeçar nga fshati Kryekuq i Divjakës, ka mbetur i vdekur mbrëmjen e djeshme në një lokal të zonës. Ai është qëlluar me thikë nga një person i identifikuar si Xheison Toromëni, i cili është arrestuar pas disa orësh nga Policia e Fierit.
Fatkeqësisht, si pasojë e plagëve të marra, 32 vjeçari Besmir Kumria ka ndërruar jetë. Ai jetonte në Divjakë dhe punonte si punëtor sezonal në Himarë.
“Gjatë mesnatës, shërbimet e Komisariatit të Policisë Divjakë, pas marrjes së njoftimit se në fshatin Kryekuq një shtetas i paidentifikuar kishte hyrë në një lokal dhe kishte goditur me mjet prerës shtetasin Besmir Kumria, 32 vjeç (i cili ishte në shoqërinë e miqve të tij), shkuan menjëherë në adresën e dhënë.
U ngrit grup i posaçëm hetimor, në drejtimin e Prokurorisë, me qëllim zbardhjen e plotë të ngjarjes, identifikimin dhe kapjen e autorit.
Si rezultat i ndjekjes së pandërprerë nga forcat operacionale të DVP Fier, u bë e mundur kapja dhe shoqërimi në Polici i autorit të dyshuar, shtetasit Xheison Toromeni, 25 vjeç, banues në Kryekuq, i cili do të arrestohet për veprat penale “Vrasja me paramendim” dhe “Prodhimi dhe mbajtja pa leje e armëve të ftohta”, thotë Policia.
Nga hetimet paraprake dyshohet se shtetasi Xheison Toromeni e ka vrarë shtetasin B. K., pasi familjet e tyre kanë pasur konflikte të vazhdueshme për një kanal vaditës në fshat. Vijon puna për dokumentimin e plotë ligjor të ngjarjes.
