Në një raport të publikuar së fundmi në Britaninë e Madhe, shqiptarët ishin në vend të parë, për të kryer martesa false vetëm që të pajiseshin me dokumente.
BBC News publikoi shifrat ku tregonin se 365 çifte ishin përpjekur të shfrytëzonin me mashtrim një skemë post-Brexit duke u dhënë qytetarëve të BE-së dhe bashkëshortëve të tyre të drejtën për të qëndruar në Britani.
Në vitin 2018, Skema e Zgjidhjes së BE-së përcaktoi se si qytetarët e Bashkimit Evropian, bashkëshortët dhe anëtarët e familjes së tyre mund të vazhdonin të jetonin në Britani pasi vendi u largua nga BE.
Ata duhej të ishin rezident deri në dhjetor 2020 dhe të aplikonin për leje qëndrimi. Bashkëshortët nga çdo vend kishin të drejtë të aplikonin.
BBC News zbuloi se çiftet u përpoqën të shfrytëzonin në mënyrë mashtruese skemën duke hyrë në një martesë të rreme me shtetas të BE-së në këmbim të parave.
Shpesh këtu përfshiheshin edhe bandat e krimit të organizuar.
Të gjitha martesat e propozuara ku njëri prej partnerëve nuk ka status imigrimi i referohen Home Office për hetim.
Nga 60 vende që ishin përfshirë në këtë mashtrim, shqiptarët kryesonin me 146 persona të përfshirë.
Dr Ervin Muço, nga Shqipëria, i tha BBC News se njerëzit paguanin bandat kriminale për atë që e shihnin si një biletë për një jetë të re.
“Këto rrjete dinë të mashtrojnë sistemin dhe po bëjnë para nga njerëzit që janë të përgatitur të paguajnë.
Vitet e fundit, shumica e meshkujve shqiptarë që janë larguar nga ky vend kanë shkuar në Itali apo Greqi, por disa prej tyre nuk kanë mundur të marrin nënshtetësinë në këto vende.
Kështu që disa përpiqen të gjejnë gra nga vendet evropiane me të cilat mund të martohen. Ata mund të kenë të gjitha përfitimet e të qenit qytetar evropian.
Dhe për shkak se Britania ishte anëtare e BE-së, shumë shqiptarë janë tërhequr nga Britania e Madhe,” deklaroi ai.
