Një tjetër dasmë pritet që të pushtojë faqet e gazetave dhe të mediave online përgjatë ditëve në vijim.
Pas dasmës së djalit të George Soros, Aleks Sorosit e cila pritet të zhvillohet më 14 qershor, edhe shqiptarja Mira Murati ka vendosur që t’i japë fund beqarisë në një ceremoni e cila pritet që të jetë përrallore.
Sipas asaj që A2Cnn ka raportuar së fundmi shqiptarja që i dha botës inteligjencës artificiale, ChatGPT, do të martohet me partnerin e saj në një ceremoni private në Toskanën e bukur të Italisë.
Thuhet se kjo dasmë do të jetë e “blinduar” nga të gjitha anët. Ku të gjithë të ftuarit kanë firmosur një kontratë të rreptë privatësie, e cila i ndalon që të publikojnë foto apo video nëpër rrjetet sociale nga ceremonia.
Por, ashtu sikurse gjithmonë ndodh disa detaje kanë “rrjedhur”. Mësohet se në dasmë, ashtu si dhe tradita e shqiptarit e do, nuk do të mungojnë ritet dhe zakonet tona.
Mira do të veshë kostumin tradicional të nuseve të Jugut, me jelekun karakteristik të zonës së Vlorë, gjithashtu nuk do të mungojnë as vallet popullore shqiptare.
E për më shumë detaje, nuk na mbetet gjë tjetër “të kryqëzojmë gishtat” dhe të shpresojmë që diku nëpër rrjet do të qarkullojë ndonjë detaj, apo pse jo dhe ndonjë foto e Mirës si nuse!
