Për herë të parafundit, dëgjuam se Georgina Rodríguez humbi një prej binjakëve gjatë lindjes dhe e përshkroi këtë përvojë si dhimbjen më të madhe.
Ndërsa hera e fundit ishte dje, kur Georgina u paraqit duke pushuar në Ibiza, së bashku me familjen e saj.
Deri këtu, gjithçka normale, derisa mbërrijmë tek titujt e neveritshëm dhe të pasjellshëm, të cilët pa asnjë kriter dhe standard “gjykojnë” trupin e një gruaje që para pak kohësh ka sjellë në jetë një fëmijë.
Dje, në një pjesë të madhe të portaleve, është bërë një krahasim i pavend mes partnerit të Gerogina-s, futbollistit Cristiano Ronaldo, i cili sipas mediave duket në super formë, ama nuk mund të thonë të njëjtën gjë për Georgina-n.
Që këtu nis një problem shumë i madh: ai i gjykimit të trupit dhe pamjes së jashtme të njerëzve, duke harruar vlerat dhe karakterin e gjithsecilit prej nesh. Georgina, ashtu si të gjitha gratë e kësaj bote, mund të marrë kilogramë, të ketë strija dhe celulit, sepse fundja, është mëse NORMALE, ama dëmi psikologjik dhe pasiguritë që i shtohen vajzave dhe grave që lexojnë të tillë tituj dhe artikuj është e pakrahasueshme.
Lufta për klikime është më e fortë se kurrë, duke “sakrifikuar” edhe pasiguritë dhe mirëqenien mendore të vajzave dhe grave.(Anabel)
