Një trend i ri në TikTok ka tërhequr vëmendjen e terapistëve, të cilët besojnë se mund të ndihmojë në zbulimin e disa problemeve shëndetësore. Bëhet fjalë për “trendi i marshimit”, ku pjesëmarrësit mbyllin sytë dhe marshojnë në vend për një minutë, zakonisht nën tingujt e hitit “Cotton Eye Joe” nga Rednex.
Qëllimi i lojës është të qëndroni në të njëjtin pozicion ku nisët, brenda një katrori të vizatuar në dysheme. Por, shumica e njerëzve dështojnë dhe përfundojnë duke lëvizur nga vendi i tyre fillestar pa e kuptuar.
Ndërsa duket si një lojë argëtuese dhe e padëmshme, terapistët kanë shpjeguar se ky ushtrim mund të ndihmojë në zbulimin e problemeve me ekuilibrin ose marramendjen. Sipas ekspertëve të “Rebalance,” një qendër fizioterapie, ky trend përdoret për të vlerësuar shëndetin e veshit të brendshëm dhe problemet e lidhura me marramendjen apo ndjeshmërinë ndaj lëvizjes.
Në një video të publikuar në TikTok (@rebalance.pt.sc), ata shpjegojnë:
“Ky është një test që ne përdorim si fizioterapistë për të përcaktuar nëse duhet të trajtojmë dikë për marramendje, ndjeshmëri ndaj lëvizjes ose për probleme të veshit të brendshëm. Testi quhet “Stepping Fukuda” dhe sipas studimeve, nëse pas 25 hapash devijoni më shumë se 30 gradë në një drejtim, mund të keni një deficit.”
Kjo mënyrë kreative për të kuptuar më shumë mbi shëndetin është një tjetër shembull se si platformat si TikTok mund të jenë një mjet edukativ, përveçse argëtues. Për ata që janë kuriozë për të provuar këtë trend, mos harroni: një marshim në vend mund të zbulojë më shumë sesa mendoni!
