Alessandra Matteuzzi, agjente 56 vjecare e shitjeve në sektorin e modës, vdiq disa hapa larg shtëpisë së vet në Bolonja të Italisë nga dora e ish-partnerit, Giovanni Padovani, me profesion futbollist dhe model.
27 vjecari pranoi gjithçka para hetuesve. Ai tha se e kishte pritur për orë të tëra para banesës, e më pas, e ka sulmuar me çekiç.
Kur Alessandra u vra, ajo ishte në telefon me motrën e saj: “E dëgjova duke bërtitur : “Jo, Giovanni, jo, te lutem jo, më ndihmoni’”, tha e motra.
Lidhja mes tyre kishte qenë mjaft e shkurtër, por Alessandra ankohej se Giovani kishte nisur ta përndiqte me telefonata, mesazhe e afrime tek banesa e saj.
Kjo e detyroi që në muajin korrik ta denonconte në polici për ndjekje të riun futbollist, që kishte qenë dhe ish model.
Ishin njohur një vit më parë në rrjetet sociale, e kishin pasur disa takime bashkë, por ai kishte nisur të shfaqte shenja dhunë, sipas motrës së viktimës.
Kjo e kishte shqetësuar Alessandrën që kishte vendosur të ndahej.
“Ai nisi të thyente gota e pjata, ishte ngjitur një ditë në tarracë, i kishte dritat e apartamentit dhe i zinte pusi nëpër shkallë”, tregon motra e përlotur.
Kjo gjë i kishte rënë në sy dhe fqinjëve, të cilët rrëfejnë se gruaja kishte frikë prej tij së fundi dhe nuk donte ta linte që të hynte në banesë.
