Papa Françesku ka miratuar një vendim që lejon priftërinjtë të bekojnë çiftet e pamartuara dhe të të njëjtit seks.
Një raport nga zyra doktrinore e Vatikanit, detajet e të cilit u publikuan në Vatican News, tha se bekime të tilla do të lejoheshin, megjithëse me paralajmërime.
“Do të jetë e mundur të bekohen çiftet e të njëjtit seks, por pa asnjë lloj rituali ose pa krijuar përshtypjen e një martese,” thuhet në raport. Për më tepër, “doktrina në lidhje me martesën nuk ndryshon dhe bekimi nuk nënkupton miratimin e bashkimit”.
Pavarësisht kufizimeve, megjithatë, vendimi shënon një hap të rëndësishëm nga Vatikani, i cili në vitin 2021 tha se kisha katolike nuk mund të bekonte çiftet e të njëjtit seks pasi Zoti “nuk bekon mëkatin”.
Vendimi i ri thotë se priftërinjtë duhet të vendosin rast pas rasti dhe “nuk duhet të parandalojnë ose ndalojnë afërsinë e kishës me njerëzit në çdo situatë në të cilën ata mund të kërkojnë ndihmën e Zotit nëpërmjet një bekimi të thjeshtë”.
Megjithatë, theksohet se bekimi për çifte të tilla nuk duhet t’i ngjasojë një ceremonie civile apo të kryhet me ndonjë veshje, gjest a fjalë që ngjason me një dasmë.
Që kur u zgjodh Papë në mars 2013, Papa Françesku ka përcjellë një ton më gjithëpërfshirës ndaj komunitetit LGBTQ+ në deklaratat e tij publike. Menjëherë pasi u bë papë, ai tha në përgjigje të një pyetjeje për priftërinjtë homoseksualë: “Kush jam unë për të gjykuar?”
