Bordi i Transparencës ka marrë vendimin për tregtimin me pakicë për katër produkte ushqimore që do të hyjnë në fuqi nga dita e sotme.
Kështu orizi kokërrgjatë do të shitet me 104 lekë për kg, sheqeri me 123 lekë për kg, vaji i lulediellit me 321 lekë për litër dhe mielli masiv me 90.5 lekë për kg.
Ky vendim është marrë ditën e djeshme por është bërë publik sot. Ai është i detyrueshëm për të gjitha subjektet që tregtojnë produktet e përcaktuara në këtë vendim.
Ndërkohë, ajo që vihet re është se çmimi i vajit të lulediellit dhe sheqerit ka shënuar rritje.
Edhe pse Bordet e Transparencës u ngritën nga Edi Rama për uljen dhe mbajtjen nën kontroll të çmimeve, për të mos pasur abuzime, duket se në fakt, Bordet janë ngritur vetëm për rritjen e çmimeve, por me vendim Qeverie.
Kështu po ndodh prej ditësh edhe me karburantet dhe gazin, që ka pësuar një rritje të frikshme, me vendim të Bordit.
Pra ato që u ngritën për të na lehtësuar çmimet, në fakt po përdoren për t’i ngritur edhe më shumë çmimet.
Arsyeja? Sepse oligarkët e karburanteve dhe ushqimeve fitojnë më shumë, por edhe Qeveria fiton më shumë, pasi sa më të larta çmimet, aq më shumë rriten taksat dhe për rrjedhojë, rriten edhe fitimet e Qeverisë.
Ndaj, le t’i gëzojmë Bordet!
