Ylli Manjani ka komentuar project kodin e ri penal, ku ndër të tjera propozohet dhe rikthimi i dënimit të shqiptarëve për tradhti ndaj atdheut, njësoj si në kohën e komunizmit.
Ai thotë se ky propozim nuk ka sens dhe mund të kishte kuptim vetëm nëse do të ishim në luftë.
Postimi i Manjanit
Atdheu ka vetëm tradhëtarë. Këtë vetë projekt Kodi i ri Penal nuk e di.
****
Projektkodi i ri penal propozon rikthimin e dënimit të shqiptarëve për tradhti ndaj atdheut. Në vitin 1995 e hoqëm nga Kodi Penal këtë vepër që ishte më parë në kodin e qeverisë komuniste.
E hoqëm nga lista e veprave penale me një arsyetim të thjeshtë: të heqim ndëshkueshmërinë me natyrë politike të shqiptarëve.
Sot propozohet të rikthehet në listën e stërgjatë të veprave penale.
E di që snobët ndërkombëtaristë janë të gatshëm të na listojnë një numër shtetesh të NATO-s që u ka mbetë ai nen në kodet e tyre penale.
Por do t’u lutesha për një moment të mos na bëjnë majmunin ndërkombëtar dhe, së bashku me atë listë të na tregojnë se sa është zbatuar ky nen në ato vende, në 100 vitet e fundit?
Kush më shumë se shteti shqiptar i 80 viteve të fundit ka dënuar shtetasit e vet për tradhëti ndaj atdheut?
Gjejini këto statistika njëherë pastaj bëni majmunin.
Tani, të arsyetojmë pak për shoqërinë tonë, shqiptarët tanë dhe marrëdhënien e tyre me atdheun. Me dhéun e atit/babës.
A mund të flitet më për tradhëti ndaj atdheut kur:
- Gjysma e popullsisë ka vendosur (për arsye të njohura) ta braktisë atdheun? D.m.th kanë braktisur tokën (dhéun) e babës, shtëpitë e tyre e madhe edhe baballarët e tyre?!
- Kemi masivisht shqiptarë mbajtës edhe të një shtetësie tjetër, nga ku kanë detyrime edhe për shtetin tjetër?!
- Kemi zyrtarë shteti që krenohen hapur se janë amerikanë, anglezë, italianë etj dhe, se paguhen nga agjensitë e tyre sekrete?! P.sh këta të drejtësisë së re që punojnë hapur për Amerikën, çfarë janë në raport me at’dheun e tyre që i paguan për ti shërbyer shqiptarëve?!
- Kemi vendimarrje publike që dhéun e atit ja vëmë në dispozicion cilitdo përveç se të birit trashëgimtar?!
A mund të flitet për tradhëti ndaj atdheut në këto kushte pra?
A mund të flitet për tradhëti ndaj atdheut kur tradhëtia ndaj tij është normë sjellje?! A ndalohet tradhëtia ndaj atdheut kur të gjithë e braktisim atë për arsye krejt bazike?
Do ta kuptoja disi këtë nen në kohë lufte ku kërkohet rrjeshtim në llogore. Por në kohë paqe, rreziku është që tradhëtarët e vetëm të jenë ata që braktisin llogoren politike ose llaxoren publike.
Se ne e kemi edhe atë shprehjen “kush nuk e bën shurrën me shokët, është o spiun o tradhëtar”…
Shikojeni pra sa kollaj shpallesh tradhëtar në këtë vend të mbushur me tradhëti e tradhëtarë. Për një privatësisi në bërje shurre të shpallin tradhëtar. Imagjino më shumë…
Shoqëria jonë e mbushur me tradhëtarë nuk e ndalon dot tradhëtinë me kod penal.
Po këtë gjë vetëm projektkodi i ri nuk e di…
