“Im atë nuk bënte kurrë kompromis për tre gjëra. Për familjen, Zotin e Atdheun!” tha Ersi, djali i ish-presidentit Bujar Nishani në fjalimin e lamtumirës që u mbajt në varrezat e Sharrës.
“Familja jonë sot i jep lamtumirë busullës së saj drejtuese.
Kombi shqiptar i jep lamtumirën një shërbëtori të përulur.
Zotit i shtohet një ëngjëll në parajsë. Lamtumirë baba, të qoftë i lehtë dheu”, shtoi ai.
Në raste të tilla kuptohet dhimbja dhe emocionet, por dhe përpiqet të respektohet tradita shqiptare, se për të vdekurin nuk flitet keq.
Por ndoshta djali i Bujar Nishanit do të bënte mirë të kujdesej të fliste vetëm për anën familjare të të atit, se atë politike apo patriotike, e njohin mirë të gjithë.
Bujar Nishani konsiderohej thjesht një burrë i mirë, por nuk ishte as ndonjë patriot, as ndonjë politikan që do të mbahet mend për ndonjë kontribut të madh për vendin.
Ai thjesht ishte një politikan i urtë dhe i bindur deri në fund ndaj Sali Berishës, falë dhe së cilit eci në politikë.
Ndaj i biri do të bënte mirë të shmangte fjalët e mëdha, se jo për gjë, por kur flet për patriotizëm, të gjithëve iu kujtohet që vetë ai la pasaportën shqiptare për të jetuar në një shtet tjetër.
