Një operacion i policisë së shtetit dhe departamentit kundër trafiqeve dhe krimit të organizuar ka bllokuar një server në kryeqytet në një bazë e cila kodonte telefonat celularë për komunikime të pa gjurmueshme.
Report Tv mëson ekskluzivisht se baza e gjetur në Tiranë është në rruga “Mahmut Fortuzi” dhe është zbuluar pas 4 muaj hetimesh. Qindra telefonë janë sekuestruar nga policia. Operacioni është në vijim.
Policia e shtetit ka mundur të sigurojë pamjet e klientëve që kanë koduar telefonat përgjatë disa javëve tek ky servis. Me anë të këtyre telefonave dhe aplikacioneve të koduara kryhet trafik droge e trafik armesh.
Në hetim është një teknik 35 vjeçar, banues në Tiranë, me origjinë nga Saranda. Aplikacionet e kodimit janë të tilla si Encrochat, BQ, Signal, etc. Telefona të tillë punojnë të koduar me internet pa karta SIM.
Çfarë është EncroChat dhe aplikacionet e tjera
EncroChat është një rrjet komunikimi dhe ofrues shërbimi me bazë në Evropë, i përdorur kryesisht nga anëtarët e krimit të organizuar për të planifikuar aktivitete kriminale. Kjo u zbulua nga Europol gjatë një operacionit të zhvilluar gjatë muajve mars dhe qershor.
Natën e 12–13 qershorit 2020 kompania njoftoi se do të pushonte së funksionuari për shkak të operacionit policor.
Shërbimi kishte rreth 60,000 abonentë në kohën e mbylljes së tij. Si rezultat i aftësisë së policisë për të lexuar mesazhe të koduara në EncroChat, të paktën 1000 arrestime janë bërë në të gjithë Evropën që nga 22 dhjetori 2020. EncroChat u përdor nga grupet kriminale.
EncroChat së pari erdhi në vëmendjen e mediave kur u zbulua se kriminelët e profilit të lartë si Mark Felloës dhe Steven Boyle kishin përdorur pajisjet e koduara për të komunikuar gjatë vrasjes së John Kinsella në Rainhill në maj të vitit 2018 .
Shërbimi u rishfaq në media gjatë verës së 2020 pasi organet e zbatimit të ligjit njoftuan se ata kishin depërtuar në rrjetin e koduar.
Rrjeti i komunikimit EncroChat është përdorur gjerësisht edhe nga kriminelët shqiptarë. Një rast i tillë është i shqiptarit me emrin Fatjon Kurti, i cili përdorte këtë platformë komunikimi për të shitur drogën e klasit A.
Në bisedat e përgjuara Kurti mburrej se “biznesi i tij ishte kokaina” gjatë marrëveshjeve. Sipas zëdhënësit të NCA-së, ata mundën të bënin lidhjen e shqiptarit Kurti për makinat që kishte marrë me qira dhe të dhënat e gjetur në celularin e tij.
