Gjesti është rikthyer në muzikë me një projekt tejet personal. Kënga e tij më e re, “Memories”, vjen si një dedikim prekës për vëllain e ndjerë, Eldion Kelmendi, i cili humbi jetën tragjikisht në shtator të vitit të kaluar në moshën 15-vjeçare.
Pas një periudhe heshtjeje, Gjesti ka zgjedhur ta shprehë dhimbjen, mungesën dhe mallin përmes muzikës. “Memories” është një rrëfim i hapur emocional, ku artisti flet për kujtimet që nuk fshihen kurrë, për boshllëkun që lë pas humbja dhe për përpjekjen për të vazhduar jetën, edhe kur gjithçka duket e pamundur.
Teksti i këngës është i mbushur me reflektime për kohën e kaluar bashkë, për pyetjet pa përgjigje dhe për ndjesinë e fajit që shpesh shoqëron humbjen.
“Muzika më ka qëndruar gjithmonë pranë, si në gëzim ashtu edhe në dhimbje. ‘Memories’ është një këngë që e kam shkruar me lot dhe që e kam pasur shumë të vështirë ta regjistroj. Jam përpjekur ta kursej familjen time, që të mos i mërzis shumë. Në gjithë këtë mërzi, po mundohem të gjej lumturi që po kthehem në muzikë afër jush.” – shkruan Gjesti në Instagram.
Edhe vizualisht, “Memories” ka një atmosferë të errët dhe reflektuese, në harmoni me temën e këngës. Me këtë projekt, Gjesti nuk sjell thjesht një këngë të re, por një homazh për vëllain dhe një mënyrë për të ndarë dhimbjen me publikun.
