Partia Demokratike e sheh arrestimin e kryebashkiakut të Tiranës Erion Veliaj si një provë të “kapjes së SPAK-ut” nga qeveria e Edi Ramës.
Zëra të rëndësishëm nga PD, duke përfshirë Edi Palokën dhe Belind Këlliçin, aludojnë se arrestimi i Veliajt është bërë pikërisht sot, “për të sfumuar lajmin e ardhjes së udhëheqësit të fushatës së Trump në PD”.
“Tronditja që shkaktoi ardhja e krahut të djathtë të Presidentit Trump, Chris LaCivita, çoi në urdhrin e menjëhershëm dhe të pashmangshëm të Edi Ramës për arrestimin e Erion Veliajt“, deklaroi BelindKëlliçi.
Këtë e tha edhe Edi Paloka:
“SPAK thjeshtë vërtetoi dhe një herë se është në shërbim të Ramës duke dashur të lërë në hije me këtë lajm faktin që grupi i cili nxorri fitues Presidentin Trump, do drejtojë dhe PD në fitore“.
Mesa duket PD-ja kishte planifikuar ta shndërronte ditën e sotme në një festë, dhe me një pasqyrim mediatik sa më të madh kontratën me Chris LaCivita, i cili udhëhoqi fushatën elektorale të presidentit Donald Trump.
Lajmi i arrestimit të Veliajt, sigurisht që e ka eklipsuar këtë zhvillim nga PD-ja, por pretendimi i tyre se kjo ka ndodhur qëllimisht, ka shkaktuar jo pak habi edhe te komentuesit e shumtë në rrjetet sociale.
Këtë pretendim të Këlliçit dhe Palokës e ka përforcuar me një qëndrim zyrtar PD-ja përmes zëdhënëses Floriana Garo.
Ajo tha në një deklaratë për media se “Edi Rama urdhëroi prokurorët të arrestojnë Veliajn”, pasi u tremb nga ardhja e Chris LaCivita në Shqipëri.
