Një dremitje e shpejtë gjatë ditës mund të duket si zgjidhja perfekte për të rifituar energjinë, por a e ke menduar ndonjëherë se mund të të dëmtojë më shumë sesa të të ndihmojë? Po sikur nevoja për gjumë gjatë ditës të jetë një shenjë që diçka nuk shkon me zakonet e tua të gjumit të natës?
Ndërsa një dremitje e shpejtë mund të të ndihmojë të përmirësosh humorin ose të të mbajë të përqendruar, dremitjet e gjata dhe të shpeshta mund të sinjalizojnë probleme me gjumin e natës, si gjumë të pakët apo cilësi të dobët gjumi. Kjo mund të krijojë një cikël të ndërlikuar: fle gjatë ditës, pastaj e ke më të vështirë të flesh natën dhe kështu nevoja për një tjetër dremitje bëhet më e madhe ditën tjetër.
A është dremitja e shëndetshme për ty? Ja disa gjëra që të ndihmojnë ta kuptosh:
Kohëzgjatja është thelbësore. Dremitjet e shkurtra, rreth 20 minuta, janë perfekte për të marrë një dozë energjie pa të prishur gjumin e natës. Dremitjet më të gjata mund të të lënë të përgjumur dhe të të shkaktojnë probleme për të fjetur më vonë.
Zgjidh momentin e duhur. Dremitja më e mirë është pasdite herët, kur trupi yt kalon natyrshëm në një fazë energjie në rënie. Dremitjet në mbrëmje vonë mund të të prishin gjumin e natës.
Rishiko zakonet e gjumit. Nëse ndihesh gjithmonë i/e lodhur dhe ke nevojë për dremitje çdo ditë, mund të jetë koha të analizosh cilësinë dhe sasinë e gjumit që po merr gjatë natës. Nëse po bën 7-8 orë gjumë, por prapë je i/e lodhur, mund të ketë një problem që kërkon vëmendje.
Vendi bën diferencën. Për një dremitje të cilësisë së lartë, kujdesu të krijosh një mjedis të rehatshëm, të qetë dhe të errët, ku nuk do të shpërqendrohesh.
Nëse dremitja bëhet zakon i përditshëm dhe ndikon negativisht në cilësinë e gjumit tënd të natës, mund të jetë koha të rishikosh rutinën e gjumit dhe të mendosh për ndryshime të shëndetshme.
