Zbardhen dëshmi të tjera të të penduarit të drejtësisë, Nuredin Dumanit në GJJKO edhe këtë të martë.
Sipas burimeve i penduari i drejtësisë tha detaje sesi ka dalë nga burgu.
Mësohet se ai ka deklaruar se e ka ndihmuar dhëndri i vëllait të ministrit të asaj kohe, Nasip Naços.
“Më ka ndihmuar dhëndri i vëllait të Nasipit që është mjek, më bëri sikur isha për të vdekur për të më liruar nga burgu. Me nxori nga burgu, më bëri disa letra sikur vuaja nga zemra.”
“Kam paguar lekë për këtë gjë”-mësohet të ketë deklaruar Dumani.
Sipas dëshmitarit të drejtësisë, ndërmjetës për ta liruar nga burgu ka qenë avokati Alban Brengasi.
Dumani tha se i ka dhënë 40 mijë euro dhëndrit të vëllait të Nasipit, qe në atë kohë ishtë shef spitali, përmes Alban Bengasit.
Lidhur me dëshminë e tij, ka reaguar Nasip Naço.
“Jam njohur sot nga mediat ku përmendet emri im. Dua të theksoj se:
1. Distancohem nga çdo akuzë e bërë publike sot dhe ftoj organet e drejtësisë që të kryejnë një hetim të thelluar mbi këtë rast. Nëse akuzat vërtetohen, organet përkatëse duhet të marrin masa ligjore ndaj çdo personi të përfshirë në këtë çështje.
2. Roli i Ministrit të Drejtësisë, sipas legjislacionit në fuqi, është i kufizuar. Ministri:
– Nuk heton,
– Nuk ngre akuza,
– Nuk pushon çështje,
– Nuk jep vendime fajsie apo pafajsie.
Detyra e tij lidhet vetëm me dhënien e lejeve të veçanta për të dënuarit, bazuar në ligj.
3. Gjatë ushtrimit të detyrës sime si Ministër i Drejtësisë, nuk kam miratuar asnjë leje të veçantë për subjektin në fjalë.
4. Distancohem nga çdo mashtrim, i bërë nga kushdo, individualisht apo në bashkëpunim, për të dëmtuar integritetin tim. Akuzat publike të bëra sot nuk përputhen me faktet reale të ushtrimit të detyrës sime si Ministër”, shprehet ai.
