Policia e Sarandës ka vënë në pranga dy trajnerët e ekipit të Butrintit pasi dhunuan futbollistin e tyre Albi Selimaj.
Ngjarja e rëndë ndodhi ditën e djeshme gjatë ndeshjes miqësore me ekipin e Memaliajt. Sipas raportimeve dhe denoncimeve nga vetë futboll klubi i Butrintit, trajnerët e zëvendësuan Selimajn për shkak të performancës së dobët dhe e goditën me grushte teksa po hynte në dhomat e zhveshjes.
Në prangat e policisë janë vënë trajnerët Neritan Novi dhe Dhiogjen Muço, me akuzën “goditja e sportistit, trajnerit, arbitrit ose ndërmjetësit sportiv”.
Njoftimi i policisë së Sarandës:
Goditën me grushte, futbollistin e ekipit, gjatë ndeshjes së futbollit, vihen në pranga 2 trajnerët e këtij ekipi.
Specialistët për Hetimin e Krimeve të Komisariatit të Policisë Sarandë, pas marrjes së njoftimit se një futbollist ishte goditur me grushte, gjatë një ndeshjeje, menjëherë kanë nisur punën për zbardhjen e plotë të kësaj ngjarjeje.
Nga veprimet hetimore ka rezultuar se shtetasi A. S., 21 vjeç (futbollist) ishte goditur me grushte, gjatë një ndeshjeje futbolli, nga 2 trajnerët e ekipit të futbollit në të cilin ai ishte pjesë.
Aktualisht 21-vjeçari ndodhet në spitalin e Sarandës, në kujdesin e mjekëve.
Në përfundim të veprimeve për këtë rast u bë ndalimi i shtetasve N. N., 52 vjeç (trajner i parë) dhe Dh. M., 45 vjeç (trajner altlet), për veprën penale “Goditja e sportistit, trajnerit, arbitrit ose ndërmjetësit sportiv”, kryer në bashkëpunim.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme.
