Një shqiptar po kandidon për në Kongresin amerikan.
Gazeta lokale “Yonkers Tribune” shkruan se ligjvënësi i Kontesë Westchester, shqiptaro-amerikani Vedat Gashi, më 8 shkurt ka regjistruar zyrtarisht kandidaturën e tij për zgjedhjet e Partisë Demokratike për në Kongresin Amerikan.
Ai ka ndërmarrë kështu hapin e parë për të sfiduar kongresmenin aktual Jamaal Bowman në zgjedhjet paraprake që do të mbahen në Partinë Demokratike më 23 qershor, në Distriktin e 16-të në New York.
Kjo është pikërisht e njëjta zonë që ka përfaqësuar në Kongres për vite me radhë kongresisti i njohur Eliot Engel, themelues dhe bashkëkryetar i Kaukusit të Çështjeve Shqiptare në Dhomën e Përfaqësuesve. Kujtojmë se Engel luajti veçanërisht një rol të madh në lobimin për Kosovën. Ai humbi në vitin 2020 garën brenda partisë përballë një Bowman duke lënë Kongresin pas më shumë se 30 viteve punë.
Por kush është Vedat Gashi?
Vedat Gashi ka lindur në Kosovë dhe është vendosur me familjen në SHBA kur ishte vetëm 4-vjeç në vitin 1982.
Në moshën 4-vjeçare, ai dhe familja e tij u larguan nga regjimi shtypës për në Shtetet e Bashkuara. Ai fillimisht u zhvendos në The Bronx dhe më vonë la rrënjë të përhershme në Yorktown.
Vedat është një nga pesë fëmijët, katër prej të cilëve ende jetojnë në Yorktown ku po rrisin familjet e tyre. Vedati jeton dhe punon në qytetin e tij Yorktown, me gruan Vjosa, dhe dy fëmijët e tyre, Leka (6-vjeç) dhe Hana (4-vjeç), të cilët gjithashtu ndjekin shkollat publike të qytetit.
Gashi është një avokat i pasurive të patundshme dhe një biznesmen. Ai është diplomuar në Shkollën e Lartë Lakeland, Kolegjin e Connecticut dhe Shkollën Juridike Seton Hall. Angazhimi i Vedatit në shërbimin publik erdhi nga përvoja e familjes së tij si aktivistë politikë dhe refugjatë, mundësitë që ai kishte duke punuar me udhëheqës frymëzues dhe përvoja e tij për të ndihmuar të krijojë një vend nga hiri i luftës.
Vedati u thirr në shërbim në Kosovë, në vitet e para të ngritjes së sistemit të drejtësisë së Kosovës, menjëherë pas shpalljes së pavarësisë – për t’iu bashkuar përpjekjeve të SHBA/BE në ndërtimin e sistemit të drejtësisë e ligjit në Kosovë.
Ai dhe kolegët ndërkombëtarë ( amerikanë e shqiptarë nga Amerika ) shkuan në Kosovë për të ndihmuar në krijimin e shtetit të sapoformuar të Kosovës – së pari përmes një granti nga Fondacioni Rockefeller Brothers Fund dhe më vonë përmes Agjencisë Amerikane për Zhvillim Ndërkombëtar (USAID) dhe Kombet e Bashkuara.
Ndërsa ishte në Kosovë, puna e palodhur e Vedatit e çoi atë në arritje të jashtëzakonshme, duke përfshirë hartimin e disa prej dokumenteve themelore ligjore të Kosovës dhe themelimin e Ministrisë se Administrimit të Pushtetit Lokal.
Gashi më vonë u emërua nga Kombet e Bashkuara për të shërbyer si Këshilltar Kryesor Ligjor i Kryeministrit të Kosovës.
Menjëherë pasi Kosova shpalli Pavarësinë, Vedati, u kthye në shtëpinë e tij të dytë në Shtetet e Bashkuara.
