Ndërsa për shumë njerëz jeta e përditshme është e mbushur me stres dhe nxitim, në Danimarkë mirëqenia dhe lumturia konsiderohen përparësi. Vendi renditet vazhdimisht mes më të lumturve në botë dhe shumë ia atribuojnë këtë mënyrës daneze të jetesës, të njohur si “hygge”.
Kjo filozofi ka të bëjë me krijimin e një atmosfere të ngrohtë, shijimin e momenteve të thjeshta dhe ndërtimin e marrëdhënieve të sinqerta me njerëzit përreth.
Ja pesë zakone që, sipas ekspertëve, i ndihmojnë danezët të jenë kaq të kënaqur me jetën.
1. Janë vetvetja
Një nga parimet më të rëndësishme të “hygge” është autenticiteti. Njerëzit nuk përpiqen të duken ndryshe nga sa janë dhe nuk ndihen të detyruar të impresionojnë të tjerët.
Ekspertja daneze e prindërimit dhe edukimit, Jessica Alexander, shpjegon se kur njerëzit heqin dorë nga nevoja për të provuar vazhdimisht vlerën e tyre, krijojnë lidhje shumë më të sinqerta. Konkurrenca, mburrja dhe shtirja, sipas saj, më shumë i ndajnë njerëzit sesa i bashkojnë.
2. Shmangin debatet që krijojnë tension
“Hygge” lidhet edhe me qetësinë në biseda. Në vend që të futen në diskutime të nxehta për politikën apo tema të tjera përçarëse, danezët zgjedhin të përqendrohen te momenti dhe te shoqëria që kanë pranë.
Kjo nuk do të thotë se nuk kanë opinione, por se nuk lejojnë që debatet e panevojshme t’ua prishin atmosferën.
3. Punojnë si ekip
Qoftë në punë apo në jetën personale, bashkëpunimi shihet si një vlerë e rëndësishme.
Të dëgjosh idetë e të tjerëve, të kontribuosh dhe të ndihesh pjesë e grupit ul stresin dhe krijon një ndjenjë përkatësie. Sipas filozofisë “hygge”, një përvojë është më e bukur kur secili jep kontributin e tij pa u ndier i detyruar.
4. Krijojnë biseda ku askush nuk gjykohet
Për danezët, koha e kaluar me të tjerët është një hapësirë e sigurt.
Jessica Alexander shpjegon se gjatë momenteve “hygge”, njerëzit lënë jashtë problemet, konkurrencën dhe materializmin. Kjo i ndihmon të flasin lirshëm, pa frikën se do të kritikohen apo gjykohen.
5. Shijojnë momentin
Një nga sekretet më të mëdha të lumturisë së tyre është aftësia për të qenë të pranishëm.
Qoftë një darkë me familjen, një shëtitje me miqtë apo thjesht një ditë e bukur jashtë, danezët përpiqen ta jetojnë plotësisht atë moment, në vend që të shqetësohen vazhdimisht për të kaluarën ose të ardhmen.
Në fund të fundit, filozofia e tyre është e thjeshtë: koha është e kufizuar dhe ia vlen të shpenzohet duke shijuar gjërat e vogla, jo duke u grindur apo ankuar vazhdimisht.