Pas një periudhe të vështirë dhe një beteje disa mujore me një sëmundje të rëndë, Antigona Ramosaj ka ndarë një lajm që ka emocionuar dhe gëzuar ndjekësit e saj. Nëna e artistëve të njohur Beatrix dhe Alban Ramosaj ka bërë të ditur përmes Instagramit se tashmë e ka fituar plotësisht betejën me kancerin.
Në janar të këtij viti, ajo vendosi të flasë hapur për diagnozën, duke treguar se po përballej me trajtime intensive, përfshirë kimioterapinë. Gjatë asaj kohe, mori mbështetje të madhe nga publiku dhe figura të njohura, të cilët i qëndruan pranë me mesazhe inkurajuese.
Sot, muaj më vonë, Antigona është rikthyer me lajmin më të bukur: ajo është zyrtarisht e shëruar. Në mesazhin e saj, ajo ka shprehur mirënjohje të thellë për familjen dhe njerëzit e afërt që nuk e lanë vetëm në asnjë moment. Veçanërisht, falënderoi fëmijët e saj, motrën – këngëtaren Albërie Hadërgjonaj – si dhe nënën dhe të gjithë familjarët për mbështetjen e pakushtëzuar.
Një falënderim i veçantë shkoi edhe për miqtë dhe të gjithë ata që e mbështetën me lutje dhe energji pozitive në momentet më të vështira.
Duke reflektuar mbi këtë rrugëtim të vështirë, ajo e cilësoi si një sfidë të madhe fizike dhe emocionale, por edhe si një kujtesë për vlerën e jetës. Antigona e mbylli mesazhin me nota shprese dhe optimizmi, duke theksuar se sot feston jetën, forcën dhe një fillim të ri, ndërsa mbetet thellësisht mirënjohëse për këtë shans të dytë.
