Mustafa Uğur Gönülal është i riu turk me origjinë të largët shqiptare, që ka dëshirë të çojë deri në fund amanetin e gjyshes.
Kjo e fundit ka qenë gjysmë shkodrane dhe gjysmë feriziane, edhe para se të vdiste i ka kërkuar nipit të gjejë rrënjët e tij dhe të bëhet shqiptar.
Mustafa ka kërkuar prej 10 vitesh rrënjët dhe pasi i ka gjetur ka ardhur në Shqipëri, ku ka takuar të gjithë kushërinjtë.
Tashmë, i riu po kërkon nënshtetësinë shqiptare, por i kanë hapur probleme.
Në një lidhje me Skype për “ABC e Mëngjesit”, ai ka treguar gjithçka dhe ka bërë thirrje shtetit shqiptar.
“Gjyshja ime më thoshte mos harro vendlindjen tënde biri im, je shqiptar.
Më 13 mars në e-albania bëra aplikimin, më lajmëruan pas 3 muajsh dhe i pyeta pse nuk më pranuan, më thanë se ka ndryshuar ligji. Gjyshja ime ka lindur në bashkinë e Shkodrës, nuk kishte dokumenta.
Unë bëra një kërkim prej 10 vitesh dhe kam takuar kushërinjtë e mi, farefisin tim në vitin 2016. Dëshira ime ishte të gjeja rrënjët e mia dhe harxhova 10 vjet për të gjetur kushërinjtë e mi.
Në fakt unë kam qenë zanafilla e kërkimit se unë e kisha amanet kërkimin e rrënjëve të familjes dhe unë jam iniciatori i fisit tim për të çuar në vend amanetin e gjyshes sonë.
Takimi i parë ka qenë Stamboll dhe komunikimi në rrjetet sociale, gjyshja komunikonte me letra, po jo gjithmonë shkonin për shkak të rrethanave”, u shpreh Mustafa
