Rritja e çmimit të naftës ka qenë tema që trajtoi Bes Kallaku në editorialin e puntatës së djeshme te “Kosherja”. Aktori bën një krahasim me vendet e tjera të rajonit teksa thotë se kanë një çmim më të ulët sesa vendi ynë që prodhon vetë naftë.
Më tej, Besi thotë se nuk prodhohet asgjë për faktin se fermerët nuk nxjerrin dot shpenzimet që harxhojnë për të mbjellat.
“Kur ne kërkojmë llogari pse rriten çmimet, mbreti thotë se jemi në luftë. Ishte pandemia, tha se jemi në luftë. Por ka një problem se kudo që plas lufta, Shqipëria është e para që ndjen pasojat e luftës.
Ne i ndjemë pasojat më shumë se sa atje ku ka plasur lufta. Ne kemi gjithë jetën në luftë dhe e kam me fakte. Nuk është rritur vetëm çmimi i naftës por çdo lloj asortimenti në Shqipëri.
Prodhohen 22 800 fuçi në ditë naftë ndërsa në Maqedoni dhe Serbi prodhohet zero fuçi. Ndërkohë që e kanë gjysmë për gjysmë çmimin e naftës me ne.
E bukura është se e gjithë Maqedonia tregton naftën që shkon nga Shqipëria. Ra tërmeti, jemi në luftë, ra pandemia jemi në luftë. Dhe tani del dhe thotë që i gjithë ky ngërç do të zgjidhet sa të legjitimohet Ballkani i Hapur sepse nuk do të kemi kufij fare, rritje të çmimeve të grurit.
E thotë Zeusi, nuk do të ketë më dogana dhe taksa. Shkoj në Bubq, them punoni tokat. E kemi dyfish më të madh çmimin që duhet me punuar tokën, mbjellë, korrur sesa kostoja që jep kur del gruri nga toka. Fermeri e blen naftën me të njëjtin çmim si ai që ka Benz AMG në mes të bllokut.
Nuk ke një politikë që të ndihmojnë dhe subvencionojë fermerin. Prandaj ngelin tokat pa punuar. Dalin dhe flasin për bujqësi. Ndihmoje fshatarin sepse ne nuk prodhojmë asgjë.
Ka arritur në një pikë sa nuk kemi ca bëjmë por bëjmë humor. Ka shkuar qumështi i lopës si me qenë qumësht blete. Pavarësisht se thuhet se shqiptarët nuk ngrihen, populli e tregoi shumë mirë se kur vjen puna deri aty kur ti shtrëngohesh për kafshatën e bukës dhe nuk ke çfarë të hash çohet dhe ha qeverinë”, tha Besi.
