Demokratët e Komitetit të Gjyqësorit në Dhomën e Përfaqësuesve po zgjerojnë hetimin e tyre ndaj Jared Kushner, dhëndrit të Presidentit Donald Trump.
Në fokus është projekti luksoz që ai dëshiron të ndërtojë në bregdetin e Shqipërisë, një projekt që ka shkaktuar javë të tëra protestash dhe akuzash se toka është marrë përmes akteve të falsifikuara të pronësisë.
Përfaqësuesi Jamie Raskin i Merilendit, demokrati më i lartë në Komitetin Gjyqësor të Dhomës së Përfaqësuesve, tha se ka pikëpyetje të reja në lidhje me “praktikat e dyshimta të marrjes së pasurive të paluajtshme” të Kushnerit ndaj ai ka kërkuar t’i vihen në dispozicion të gjitha të dhënat që lidhen me “miratimin ose shqyrtimin” e projekteve të tij në Shqipëri, duke përfshirë çdo komunikim mes qeverisë së SHBA-së dhe asaj të Shqipërisë.
Në një letër të bërë publike drejtuar Kushner, Raskin thotë se demokratët duan të saktësojnë nëse “sjellja e Kushnerit duhet të hetohet sipas Aktit të Praktikave të Korrupsionit të Huaj”.
Sipas ligjit amerikan është “e paligjshme që një person ose kompani amerikane të ofrojë, paguajë ose premtojë të paguajë para ose ndonjë gjë me vlerë për ndonjë zyrtar të huaj me qëllim marrjen ose mbajtjen e biznesit”.
Letra kërkon të zgjerojë një hetim që Raskin hapi në muajin prill mbi atë që demokratët e quajtën “konflikt të hapur interesi” të Kushnerit. Kjo pasi, ai ishte duke shërbyer njëkohësisht si i dërguar paqeje i Shtëpisë së Bardhë dhe njëkohësisht drejtonte një firme private kapitalesh të mbështetur pjesërisht nga fondet sovrane të Gjirit Persik.
“Teksa veproni si kryenegociatori i kombit tonë për t’u dhënë fund disa konflikteve ndërkombëtare të krijuara ose të përkeqësuara nga administrata e vjehrrit tuaj, ju keni ndarë kohë për të filluar vetë një tjetër incident ndërkombëtar të lidhur me mashtrimin”, – shkruan Raskin në letër duke iu referuar përpjekjeve të Kushnerit në Shqipëri.
Përfaqësuesit e Kushnerit në firmën e tij të investimeve nuk kanë bërë ende ndonjë koment për letrën.
Zëdhënësja e Shtëpisë së Bardhë, Anna Kelly, e quajti kërkesën e Raskin pjesë të “të njëjtës narrativë të lodhur që demokratët kanë shtyrë kundër Presidentit Trump, familjes së tij dhe administratës së tij për një dekadë”.
“Aktivitetet personale të biznesit të Jared Kushner nuk kanë të bëjnë fare me angazhimet e tij diplomatike, të cilat ai i kryen në bazë vullnetare me kërkesë të Presidentit”, – vazhdoi Kelly, duke lavdëruar atë që ajo e përshkroi si “rekord të suksesit” të Kushner në Marrëveshjet e Abrahamit dhe nisma të tjera.
Letra e plotë e Raskin
I nderuar z. Kushner:
Mund të keni qenë shumë i zënë duke shkaktuar një fiasko të re të politikës së jashtme në Shqipëri pas aventurës suaj me jaht në Adriatik, sa për të na kthyer përgjigje për disa pyetje që kemi lidhur me konfliktet tuaja të pastra të interesit që po ndodhin këtu në Amerikë.
Prandaj, në rast se keni harruar ekzistencën e një hetimi kongresual mbi konfliktet tuaja të interesit dhe praktikat e korruptuara të biznesit, po ju shkruaj për t’ju kujtuar detyrimin tuaj për t’iu përgjigjur kërkesave hetimore të Kongresit dhe gjithashtu për t’ju njoftuar se kemi zgjeruar hetimin tonë për të përfshirë praktikat tuaja të dyshimta të pasurive të paluajtshme.
Më 16 prill 2026, ju shkrova për shqetësimet e thella që ishin shprehur nga anëtarët e Kongresit lidhur me vendimin tuaj për të kërkuar investime private nga fuqi të huaja për bizneset tuaja personale, ndërsa në të njëjtën kohë vepronit si një nga negociatorët kryesorë qeveritarë të Shteteve të Bashkuara në konflikte të jashtme — rastësisht, konflikte ku investitorët tuaj janë vetë të përfshirë direkt ose indirekt.
Nga këndvështrimi i popullit amerikan, vendimi juaj për të vepruar njëkohësisht në këto dy role — njëri publik për qeverinë dhe tjetri privat për përfitime personale — ka krijuar një konflikt interesi të hapur dhe të pashërueshëm, veçanërisht kur 97% e fondeve që keni grumbulluar për firmën tuaj të investimeve janë tërhequr direkt nga fondet sovrane të qeverive të huaja, njësi tregtare të lidhura me to dhe shtetas të huaj.
Ju nuk i jeni përgjigjur asaj letre. Dhe kur stafi im kontaktoi me Affinity, ne përsëri nuk morëm asnjë përgjigje. Duke ju dhënë përfitimin e dyshimit, supozoj se mund të keni qenë shumë i zënë dhe i hutuar nga përpjekjet tuaja të përsëritura të dështuara për të negociuar një armëpushim të qëndrueshëm në Iran, Liban ose Ukrainë për t’u përgjigjur.
Ose mund të keni qenë i preokupuar me demonstratat masive të organizuara nga populli shqiptar në shenjë proteste ndaj planeve tuaja për të krijuar një resort luksoz, katastrofik për mjedisin, pranë ishullit të Sazanit dhe bregdetit të afërt të Zvërnecit, një zonë e mbrojtur që strehon qindra shpendë shtegtarë dhe kafshë ujore.
Sipas raporteve të publikuara, bashkëshortja juaj, Ivanka Trump, deklaroi se ju e “gjetët” një ishull në brigjet e Shqipërisë gjatë lundrimit me jaht nëpër Adriatik. Natyrisht, ju nuk e “gjetët” atë: Sazani është përdorur periodikisht si një instalim ushtarak që nga kohërat romake, përmes Perandorisë Osmane, derisa së fundmi u kthye në një zonë mjedisore të mbrojtur dhe strehë të jetës së egër.
Të papreokupuar nga kjo, ju mblodhët disa partnerë miliarderë nga Katari dhe lançuat një plan për të ndërtuar një resort luksoz për njerëz ekstremisht të pasur pranë ose mbi ishull.
Qeveria e Kryeministrit shqiptar Edi Rama, e cila ka kërkuar prej kohësh të ndikojë në politikën amerikane, ju dha miratimin, por Kryeministri nuk mundi të fitonte miratimin e zgjedhësve të tij për projektin tuaj të ëndrrave.
Populli shqiptar ka dalë në rrugë për të protestuar, dhe prokurorët shqiptarë kanë ngrirë asete potencialisht të rreme që lidhen me blerjen tuaj të tokës në Zvërnec, pasi doli se shitësi në të vërtetë nuk e zotëronte tokën.
Edhe pse keni pretenduar se nuk keni pasur asnjë dijeni për pretendimet mashtruese të shitësit, ëall Street Journal zbuloi së fundmi se ju e bletë tokën në fjalë nga Artur Shehu — një gangster i dyshuar dhe trafikant droge me një histori të falsifikimit të dokumenteve të pronësisë — madje edhe pasi banorët lokalë ju shkruan për t’ju paralajmëruar se z. Shehu nuk kishte titull legjitim mbi tokën.
Pavarësisht kësaj, ju shtytë përpara, i paguat z. Shehu më shumë se 120 milionë dollarë dhe pretenduat pronësinë e zonës në mosmarrëveshje. Ndërkohë, skuadra juaj private e sigurisë dhunoi banorët lokalë që guxuan të protestonin kundër rrëmbimit tuaj të dyshimtë të tokës.
Ky episod pasqyron si joseriozitetin tuaj thelbësor si një ish-përfaqësues i Shteteve të Bashkuara, ashtu edhe oreksin e tepërt dhe në dukje të pangopur të familjes Trump-Kushner për t’u përfshirë në korrupsion politik dhe financiar.
Ndërsa vepronit si negociatori kryesor i kombit tonë për t’u dhënë fund disa konflikteve ndërkombëtare të krijuara ose të përkeqësuara nga administrata e vjehrrit tuaj, ju gjetët kohën për të nisur një incident tjetër ndërkombëtar të lidhur me mashtrimin plotësisht i vetëm.
Dhe juve ju janë ofruar lëshime dhe privilegje të konsiderueshme financiare nga një qeveri e huaj, e dëshpëruar për t’u bërë e pëlqyeshme për Shtetet e Bashkuara, teksa ju, si dhëndri i Presidentit, veproni si një zyrtar qeveritar de facto.
Prandaj, ne përsërisim kërkesat tona të mëparshme dhe shtojmë disa të tjera më poshtë, duke përfshirë ato të nevojshme për të përcaktuar nëse sjellja juaj duhet të hetohet sipas Ligjit për Praktikat e Korruptuara të Jashtme (FCPA) dhe për të nxitur reforma legjislative.
Komisioni i Dhomës së Përfaqësuesve për Drejtësinë po heton sjelljen tuaj, të firmës suaj dhe të partnerëve tuaj të biznesit, me qëllim të marrjes së informacionit kritik për reformimin e ligjeve tona të ryshfetit, dispozitave të konfliktit të interesit, statuteve të tjera dhe rregullave që rregullojnë sjelljen e punonjësve të qeverisë dhe punonjësve të posaçëm qeveritarë, Ligjin për Regjistrimin e Agjentëve të Huaj dhe FCPA-në.
Ju lutemi të siguroni dokumentet e mëposhtme, së bashku me dokumentet që i përgjigjen kërkesave të mia të mëparshme, jo më vonë se ora 17:00 të datës 7 Shtator, 2026:
Të gjitha dokumentet dhe komunikimet mes jush ose çdo njësie të lidhur dhe çdo përfaqësuesi të qeverisë shqiptare lidhur me pasuritë e paluajtshme, marrëveshjet e biznesit ose protestat në atë vend;
Të gjitha dokumentet dhe komunikimet mes jush ose çdo njësie të lidhur dhe çdo përfaqësuesi të qeverisë së Shteteve të Bashkuara lidhur me pasuritë e paluajtshme, marrëveshjet e biznesit ose protestat në Shqipëri;
Të gjitha dokumentet që lidhen me miratimin ose shqyrtimin e çdo projekti të pasurive të paluajtshme në Shqipëri, duke përfshirë por pa u kufizuar në blerjet, miratimet qeveritare, pagesat ose investimet.
Ju faleminderit për vëmendjen tuaj të shpejtë ndaj këtyre kërkesave të rëndësishme mbikëqyrëse.
Pres me padurim bashkëpunimin tuaj të vonuar por të plotë me këtë çështje.
I juaji sinqerisht,
Jamie Raskin, Anëtar i Rangut të Lartë