Edi Paloka dhe Bujar Leskaj duket se kanë shkuar të dehur në Kuvend, duke shthurur gojën dhe bërë gjeste të pahijshme.
Për këtë, Partia Socialiste i kërkoi Kuvendit të Shqipërisë që të vendosë masë disiplinore me përjashtim 10-ditor nga Kuvendi për deputetët Edi Paloka dhe Bujar Leskaj.
Sipas Partisë Socialiste, kjo masë kërkohet për shkak të konsumit të pijeve alkoolike dhe se të dy deputetët bënë veprime të pahijshme dhe përdorën një fjalor banal gjatë procesit të votimit.
Në momentin kur kryetarja e Kuvendit Lindita Nikolla njoftoi mbledhjen e deputetëve për nisjen e procesit të votimit të buxhetit, Edi Paloka dhe Bujar Lekskaj janë konfrontuar verbalisht me kreun e qeverisë duke kaluar në ofendime banale.
E gjithë kjo situatë ndodhi kur regjia e parlamentit ndërpreu sinjalin, por në momentin e rikthimit të saj, dallohej kordoni i gardës që ishte vendosur në mes kryeministrit dhe deputet Paloka.
Paloka: Nuk isha i dehur
Votimi i buxhetit 2023 është shoqëruar me një incident përpara nisjes së votimit në seancë plenare.
Hyrja e Edi Ramës në sallën e Parlamentit është shoqëruar me një përplasje verbale me deputetët e opozitës, Edi Paloka dhe Bujar Leskaj.
Dy deputetët demokratë, i kanë kujtuar Ramës se nuk mund të flasë me gjuhë rrugaçi ndaj deputetëve të opozitës, njësoj siç ka bërë një ditë më parë kur i konsideroi “bedela”, “llaxore”, “të pafytyrë” etj.
Pas këtij incidenti, deputeti demokrat Edi Paloka ka deklaruar për Abc se nuk ka qenë aspak i dehur siç deklarojnë socialistët por ka dashur të çoj në vend nderin e deputetëve demokratë.
“Absolutisht nuk kemi qenë të dehur. Por kemi qenë të revoltuar absolutisht po. Unë nuk isha në seancën e ditës së mërkurë, kur Edi Rama përdori një gjuhë rrugaçi në Parlament, ndaj kolegëve të mi parlamentarë. Sot kur ai hyri në seancë për votimin, thjesht gjeta mundësinë t’i kujtoja kush ka qenë dhe kush është.
Mbase nga ata deputetë që janë në Parlament, e njoh pak më shumë Edi Ramën që kur ka qenë i ri dhe nuk mund t’i lejoj vetës dhe demokratëve të na fyej një njeri si ai. Është më minimalja që mund të bëj për demokratët të çoj nderin dhe dinjitetin e tyre në vend”, shprehet Paloka.
I pyetur për iniciativën e socialistëve për ta përjshtuar së bashku me Bujar Leskajn nga Parlamenti për 10 ditë, Paloka tha:
“Do të duhej që të ishte përjashtuar Edi Rama për atë gjuhë prej ordineri që përdori një ditë më parë. Janë fyerje që i kanë parë dhe dëgjuar të gjithë shqiptarët. Në ekran. Live. Këtë duhet të shohin socialistët”, thekson Paloka.
