Mesazhet që një ushtar rus dyshohet se i ka shkruar nënës së tij përshkruajnë se si ushtria ruse në Ukrainë “sulmon të gjithë, madje edhe civilët”.
Ato u lexuan me zë të lartë nga ambasadori ukrainas në OKB, Sergiy Kyslytsya në një takim urgjent të Asamblesë së Përgjithshme të OKB-së të hënën.
“Do të doja të lexoja mesazhet nga ekrani i telefonit të ushtarit të vrarë rus”, tha ai para se të fillonte të lexonte mesazhet në rusisht.
Fotot e teksteve janë publikuar më parë nga Shërbimi i Sigurisë së Ukrainës në Telegram (shërbimi i mesazheve të çastit), dhe ato janë publikuar nga shtëpia mediatike ukrainase Ukrinform. Nuk dihen rrethanat e vdekjes së ushtarit, përveçse mësohet se ka humbur jetën në luftime. Kyslytsya tha se mesazhet u dërguan “momente para se të vritej”.
Në një shkëmbim të konfirmuar vetëm nga burime ukrainase, ushtari i thotë nënës së tij, në rusisht, se nuk ndodhet më në Krime për stërvitje. Kur nëna e tij e pyeti nëse mund t’i dërgonte një paketë, ai tha “e vetmja gjë që dua tani është të var veten”. Më tej ai shpjegon se ndodhet në Ukrainë, ku ka një “luftë të vërtetë”.
“Kam frikë se po i sulmojmë të gjithë, madje edhe civilët”, ka shkruar ai. “Na thanë se njerëzit do të presin paqësisht këtu, por ata hidhen poshtë makinave tona, nuk na lënë të kalojmë. Na thonë fashistë. Mami, është shumë e vështirë.”
“Nëse thjesht dëshironi të imagjinoni përmasat e tragjedisë, duhet të imagjinoni pranë njëri-tjetrit, pranë çdo pllake me emrin e secilit vend në këtë Asamble të Përgjithshme, më shumë se 30 shpirtra të ushtarëve rusë të vdekur,” tha Kyslytsya kur mbaroi së lexuari mesazhet e ushtarëve rusë.
“Përveç çdo emri të çdo vendi në këtë asamble, ka më shumë se 30 ushtarë rusë të vrarë. Qindra ukrainas të vrarë. Dhjetra fëmijë të vrarë. Dhe kjo vazhdon e vazhdon.”
Kjo vjen në një kohë kur Ukraina dhe aleatët e saj kanë kërkuar një hetim të Kombeve të Bashkuara për krimet e mundshme të luftës të kryera nga Rusia gjatë pushtimit të Ukrainës.
Këshilli i Kombeve të Bashkuara për të Drejtat e Njeriut votoi të hënën për të pranuar kërkesën e Ukrainës për një debat urgjent mbi sulmin rus të enjten.
Projekt-rezoluta e Ukrainës do të shqyrtohet në një debat urgjent.
Nëse miratohet, një komision prej tre ekspertësh të pavarur do të hetojë të gjitha shkeljet e supozuara të ligjit ndërkombëtar në Krime dhe rajonet Donetsk dhe Luhansk që nga viti 2014, dhe në pjesë të tjera të Ukrainës që nga sulmi rus javën e kaluar.
