36-vjeçari amerikan Andrew Bolland rezulton i zhdukur prej më shumë se një muaji në Shqipëri, ndërsa familja e tij ka bërë apel për ndihmë në gjetjen e tij.
Në një lidhje të drejtpërdrejtë për emisionin “Në Kohë Reale” në RTSH, babai i tij, Arden Bollati, tha se kontakti i fundit me të birin është regjistruar më 21 maj, ndërsa që prej 22 majit nuk ka më asnjë informacion për vendndodhjen e tij
“Kemi humbur çdo kontakt me të dhe mendojmë që është i pastrehë dhe pa ndihmë. Ka qenë në Europë dy herë më parë, në 2024. I pëlqen të udhëtojë si turist, i pëlqejnë kulturat e ndryshme në 2024 ai u dashurua me Shqipërinë dhe njerëzit. Ai herën e parë punoi si vullnetar në një shtëpi në Shkodër. Gjatë asaj kohe ai bëri shoqëri dhe gjithashtu bëri një vizitë në Gjeorgji për të parë një fermë zarzavatesh. Qe nga 22 maji ai është i humbur”, u shpreh babai.
Sipas tij, Andrew mbërriti në Shqipëri më 30 prill dhe kishte planifikuar të qëndronte në Tiranë deri më 28 maj, për t’u kthyer më pas në Shtetet e Bashkuara të Amerikës. Para humbjes së kontakteve, ai kishte humbur telefonin, pasaportën dhe fjalëkalimet e llogarive të tij, çka e kishte vështirësuar komunikimin me familjen.
“Ai ka mbërritur në Shqipëri në 30 prill, para se të humbte kemi folur në WhatsApp. Ka pasur vështirësi sepse humbi paswordet, pasaportën, telefonin. Është minimalit, nuk ka kartë krediti, jeton me pak para. Në 21 maj ka pasur telefonatën e fundit dhe gjatë asaj telefonate ka shfaqur panik, ankth dhe një situatë jo shumë të qetë.
Ai është shprehur se do të qëndronte në Tiranë deri me datë 28 dhe më pas do të kthehej në SHBA. Për shkak të spektrit të autizmit ai refuzon që të ketë një komunikim social. Ka qenë në Shkodër dhe nuk është larguar nga Shqipëria. Ambasada më ka sugjeruar që të marr një avokat dhe të ndjek rrugën ligjore”.
Familja beson se Andrew nuk është larguar nga Shqipëria. Sipas të atit, një punonjës i hostelit ku ai kishte qëndruar deklaroi se e kishte parë në zonën e protestës në Tiranë më 6 qershor.
“Ka pasur një informacion tjetër që një person nga stafi i hostelit ku ka qëndruar ai ka thënë se e ka parë në zonën e protestës ku informacioni i fundit është me datë 6 qershor”, tha ai.
Më tej, janë raportuar edhe disa sinjalizime të tjera për praninë e tij më 9 dhe 13 qershor, të cilat familja i konsideron të besueshme bazuar në përshkrimet e marra. Ai dyshohet se është parë dy herë pranë Lanës, një herë në zonën e Qytetit Studenti dhe gjithashtu në Durrës.
“Është parë në disa zona në 9 qershor dhe 13 qershor jemi shumë të sigurt që është ai për shkak të përshkrimit që kanë dhënë. Është parë dy herë në zonën e Lanës, është parë në zonën e Qyteti Studenti dhe një herë është parë në Durrës”, tha i ati i Andrew.