Trupat ruse kanë kapur centralin bërthamor të Zaporizhzhia-s.
Lajmi u bë i ditur nga autoritetet ukrainase.
“Personeli operativ po monitoron gjendjen e njësive të energjisë”, tha një autoritet lokal në mediat sociale, cituar nga agjencia e lajmeve “Reuters”.
Personeli i stacionit vazhdon të punojë dhe të monitorojë gjendjen e njësive të energjisë.
Një zjarr shpërtheu në fabrikë më herët – më i madhi në Evropë – pas një sulmi me granatime ruse.
Ministri i Energjisë i Ukrainës, Herman Galushchenko, zhvilloi një bisedë telefonike “urgjente” me homologen e tij amerikane, Jennifer Granholm.
Kjo pas situatës në termocentralin bërthamor Zaporizhzhia. Zjarri në objekt shpërtheu në orët e para të mëngjesit të së premtes dhe është shuar duke mos lejuar shkaktimin e viktimave.
“Armiku nuk është i shqetësuar për sigurinë bërthamore dhe rrezatuese”, tha Galushchenko, sipas deklaratës.
Ai shtoi se Rusia ishte “indiferente ndaj jetëve njerëzore të ukrainasve, evropianëve dhe qytetarëve të tyre”.
“Ne jemi përpjekur t’ia përcjellim këtë mesazh Agjencisë Ndërkombëtare të Energjisë Atomike për disa ditë. Ne kërkuam ndërhyrjen e kësaj organizate ndërkombëtare dhe vendime të ashpra në lidhje me agresorin. Por ata nuk janë ende atje”, tha Galushchenko.
Nga ana tjetër, udhëheqësit botërorë kanë dënuar sulmin rus në centralin bërthamor.
Ata e kanë akuzuar Rusinë se po rrezikon sigurinë e një kontinenti të tërë.
Kryeministri i Mbretërisë së Bashkuar Boris Jonson tha se sulmi “i pamatur” i Rusisë mund të “kërcënojë drejtpërdrejt sigurinë e të gjithë Evropës”.
Presidenti i SHBA-ve, Joe Biden, i kërkoi Moskës të ndalojë aktivitetet e saj ushtarake rreth zonës, ndërsa kryeministri kanadez, Justin Trudeau, tha se “sulmet e tmerrshme” nga Rusia “duhet të pushojnë menjëherë”.
